Díli-SMI: Liu-hosi programa Koperasaun Defeza, ohin, (30/06) Governu Australia fó apoiu rádiu VHF portátil hamutuk atus ida (100) ba instituisaun Falintil – Forsa Defeza Timor-Leste – F-FDTL hodi uza ba nesesidade instituisaun nian.
Liu-hosi komunikadu ofisiál ne’ebé parte Embaxada Australia públika, esplika katak ho apoiu fasilidade komunikasaun hosi Governu Australia ba instituisaun F-FDTL nu’udar progresu pozitivu foun ida iha istória iha nivél koperasaun entre rai-rua iha area defeza nian.
“Ida ne’e marka dezenvolivmentu foun iha istória parseira ne’ebé la’o kle’ur ona hasa’e kapasidade komunikasaun nian liu-hosi programa koperasaun defeza nian”, dehan, komunikadu ne’ebé SMI asesu iha pájina ofisiál Embaxada Australia,Tersa, (30/06).
Komunikadu ne’e informa, doasaun fasilidade hanesan rádiu VHF Portátil foun hosi Governu Australia ne’e kompletu ho pakote manutensaun ne’ebé kompriensivu no ninia sistema komunikasaun bele kobre iha teritóriu laran.
“Fornesimentu ida ne’e hamutuk ho pakote ba manutensaun ne’ebé kompriénsivu nomós ho formasaun, rádiu dijitál ne’e nia sistema kobre Timor-laran tomak, no fornese komunikasaun ida ne’ebé mak seguru no konfiável ba F-FDTL sira iha Timor laran tomak”, dehan Jenerál fitun rua ne’e.
Iha komunikadu ne’e sita katak apoiu fasilidade komunikasaun ne’e ajuda tebes instituisaun milítar hodi hala’o serbisu ho di’ak iha nivél komunikasaun inklui prevensaun COVID-19.
“Ida ne’e hanesan kapasidade sentrál ba militár modernu sira hotu no rede ne’e di’ak tebes hodi uza atu apoia komunikasaun ba Timor-Leste nia asaun hodi responde ba COVID-19”, dehan komunikadu ne’e.
Relasiona ho apoiu ne'e, Xefe Estadu F-FDTL, Majór Jenerál, Lere Anan Timur, agradese ba Governu Australia ne’ebé sempre fó apoiu ba instituisaun F-FDTL durante ne’e.
Doasaun rádiu ne’e entrega diretamente hosi Embaixadór Australia iha Timor-Leste, Peter Roberts ba Xefe Estadu, Major Jenerál, Lere Anan Timur. Editór, Rui Santos).