Díli-SMI: Membru Ofisiál Superior Polísia Nasional Timor Leste – PNTL hamutuk ema na’in 29 hetan rotasaun ka mandatu ka responsabilidade foun hodi bele ajuda dezenvolve di’ak liu-tan instituisaun polísial iha futuru.
Komandante Jerál Polísia Nasional Timor Leste – PNTL, Komisariu, Faustino da Costa, fó parabens ba Ofisiál Superior PNTL hamutuk 25 ne’ebé hetan mandatu hosi komandu atu hala’o servbisu ho responsabilidade hodi kontribui ba dezenvolvimentu instituisaun polísia nian.
“Dahuluk fó parabens ba Komandante sira ne'ebé mak simu posse no hetan rotasaun iha estrutura komandu PNTL nian katak, simu responsabilidade boot atu kontribui ba Instituisaun PNTL”, dehan Komisariu, Faustino da Costa, iha Kuartel Jerál PNTL, Kaikoli, Kuarta, (01/07) wainhira hala’o ninia diskursu iha seremónia toma-pose refere.
Faustino, apela ba komadante sira ne’ebé hetan rotasaun ka transfere ba fatin seluk atu kontinua hala’o serbisu ho profísional hodi fó seguru ba moris komunidade nian.
“Komandu hosi munisípiu ida halo rotasaun / transfere ba munisípiu seluk no mai iha komandu Jerál husu atu kontinua Mantein disiplina no servisu di’ak liu tan iha area seguransa no kontribui ba paz no estabilidade iha nasaun ida ne'e”, dehan nia.
Komisariu Faustino, argumenta, motivu hosi rotasaun ka tranferénsia ne’e atu labele komandante ida bele komanda munisípiu ho durasaun tempu kleur inklui mós bele afeita ba empeñamentu iha serbisu fatin.
“Razaun tanba sá maka halo tranferensia no re-kolokasaun ne’e, katak ezizensia ida antigu ona ka kleur demais no hanesan ohin hau dehan katak labele Komandante ida hela munisipiu ka Unidade ida durante tinan sanulu ne’e tenke muda, tanba se nia kleur liu bele afeta ba ninia empeñamentu servisu”, dehan nia.
Iha parte seluk, Adjuntu Komandante Unidade Polísia Fronteira – UPF, Superintendente, João Sancho Pires, agradese ba parte komandu tanba kontinua hetan fiar hodi lidera Unidade UPF hodi garante seguransa iha liña fronteira.
“Agradese ba Komandante Jerál tamba fó nomeiasaun no fó fiar atu lidera UPF, ba oin sei hala’o serbisu ho diak”, dehan João
Nune’e mós, Komandante Jerál PNTL Munisípiu Manatuto, Superintendente, Julía Gama, hetan transferénsia fali mai kuartel jerál ba asuntu jenéru nian.
Hosi tranferénsia ne’e, Julía, agradese no kontente tanba maske hanesan feto maibe bele hetan fiar hosi komandu hodi hamutuk ho mane sira dezenvolve instituisaun PNTL iha futuru.
“Sente kontente tanba bele hetan oportunidde no grasa ida atu feto mos kompete ho mane sira iha Instituisaun PNTL nian,ba oin hamutuk ho mane sira atu dezenvolve di’ak liu-tan iha area seguransa tantu iha instituisaun rasik”, dehan Julía
Ofisiál Superior hamutuk 25 ne’ebé hetan rotasaun ne’e kompostu hosi mane hamutuk ema na’in 26 no feto hamutuk ema na’in 3. (Editór, Guido Santos).