Díli-SMI: Eis Komandante Polísia Munisípiu Díli, Superintedente Xefe, Armando Monteiro, ofisialmente entrega ona rota-ukun komandu nian ba Komandante foun Superintendente Xefe, Henrique da Costa, ne’ebé sei lidera fali polísia munisípiu Díli nian.
Liu-hosi seremónia entrega rota komandu ne’e, Atual Komandante Polisia Nasional Timor-Leste PNTL Munisípiu Díli, Superintendente Xefe, Armando Monteiro, husu agradese ba estrutura Komandu Jerál tomak ne’ebé kontribui no kolabora ona serbisu durante tinan ida resin ninia mandatu iha munisípiu Díli.
“Hato’o Agradese ba konfiansa no fiar serbisu ne’ebé Komandu Jerál fó hodi lidera (PNTL) munisípiu Díli durante nia mandatu tinan ida resin no agradese mós ba estrutura komandu Dili no membru tomak nia kolaborasaun servisu hamutuk hodi halao koperasaun hodi serbisu iha munisípiu Dili”, dehan Armando Monteiro, iha Kuartel Jerál, Kaikoli, Kinta, (02/07) hafoin seremónia entrega rota komandu nian.
Iha biban hanesan, Superintendente Xefe, Hendrique da Costa, mós hatoo ninia agradesementu wa’in ba Komandu Jerál PNTL ne’ebé fó mandatu lidera PNTL munisípiu Díli nian.
“Agradese ba konfiansa Komandu jeral PNTL nian ne’ebé fó fiar atu lidera seguransa iha area Díli hanesan kapital nasaun nian”, dehan nian.
Komandante foun ne’e afirma, ho responsabilidade ne’ebé nia simu hosi komandu PNTL, sei esforsu hodi hadi’a di’ak liu-tan seguransa iha kapitál Díli.
"Ba oin planu no progrma sira ne’ebé implementa ona sei kontinua tan planu hirak ne’e hodi hadia di’ak liu-tan serbisu seguransa Munisípiu Díli nian", katak nia.
Parte seluk, Komadante PNTL, Komisariu, Faustino da Costa, husu ba komandante sira ne’ebé hetan rotasaun ka re-alokasaun atu kontinu serbisu ho kapasidade no profísionalizmu hodi kontribui ba dezenvolvimentu instituisaun PNTL nomós seguransa iha rai-laran. (Editór, Rui Santos).
