Díli-SMI: Asosiasaun Jornalista Timor Lorosa’e – AJTL konsidera asaun petisaun hosi grupu jornalista petisionáriu ne’ebé lídera hosi eis Xefe Redasaun Timor Post, Noemio Falcao, hanesan ajente partidu ne’ebé inflitra-an iha asosiasaun jornalista hodi estraga imajen AJTL ne’ebé hafaluha ho interese ruma.
“AJTL konsidera Noemio Falcao ho ninia grupu ninia petisaun ne’e nu’udar estratejia ida atu hamonu imajen AJTL nian ho misi politik terselubung. Membru AJTL hotuhotu atu matan-moris no neo-nain tamba ajente partidu polítiku sira nian hahú infiltra tama iha asosiasaun jornalista nia leet hodi influénsia membru sira atu tama iha sira nia lasu polítika”, dehan Prezidente AJTL, Zevonia Veira, liu-hosi Konferénsia Imprensa, iha Sede AJTL, Fatuhada, Sexta, (10/07).
Zenovia Veira, afirma, Noemio Falcao ho ninia grupu jornalista petisionáriu sira ne’e nu’udar ajente partidu ne’ebé iha misaun atu hamate liberdade imprensa no liberdade espresaun iha Timor-Leste tanba sira konkorda esbosu lei kriminalizasaun defamasaun.
“AJTL konsidera Noemio Falcao ho ninia grupu ninia petisaun ne’e nu’udar estratejia ida atu hamonu imajen AJTL nian ho misi politik terselubung atu hamate liberdade imprensa no liberdade espresaun tamba grupu petisionáriu ne’e rasik afavor ba esbosu lei kriminalizasaun difamasaun iha Timor-Leste.”, Zevonia komenta.
Zevonia, argumenta tan, petisaun ne’ebé Noemio Falcao ho ninia grupu hato’o ba Parlamentu Nasional – PN iha loron Kinta, (09/06) ne’e laiha lejitimidade, satán Noemio rasik la’os membru hosi AJTL nian.
“AJTL konsidera petisaun ne’ebé Neomio Falcao ho ninia grupu hato’o ba Parliamentu Nasionál ne’e laiha legalidade no laiha lejitimidade tamba Noemio Falcao la’ós membru AJTL ne’ebé partisipa iha konferénsia AJTL nian. Tuir AJTL, desizaun konferénsia ka kongresu AJTL nian iha 4 Jullu mak desizaun ne’ebé aas-liu buat hotu tamba konferensista na’in 221 mak fó votu ba membru Conselho de Imprensa eleje, Virgílio da Silva Guterres no konfrensista 24 mak fó votu ba Sra. Rita Almeida”, dehan Zevonia.
Prezidente AJTL ne’e esplika, rezultadu konferénsia AJTL ne’ebé akontese iha loron, (04/07) foin lalais ne’e legál tanba maioria konfresista fó fiar ba atual Prezidente Conselho de Imprensa, Virgílio da Silva Guterres, liu-hosi votasaun demokrátiku no sekretu hodi reprezenta jornalista sai membru CI ba tinan hat oin mai.
“AJTL konsidera rezultadu eleisaun iha konferénsia AJTL iha 4 Jullu 2020 nu’udar rezultadu finál no desizasaun aas-liu ne’ebé konferensista sira foti hodi fó fiar ba Eis-Prezidente AJTL, Virgílio “Lamukan” Guterres atu reprezenta jornalista sira hodi sai membru Conselho de Imprensa (CI) ba periódu 2020 – 2024”, dehan jornalista no ativista ne’e.
Xefe Editór mídia Online Neon Metin ne’e hatutan tan, razaun AJTL hodi kontinua nomeia Virgílio Guterres, hodi reprezenta jornalista iha CI tanba durante ne’e halo ona esforsu hodi dezenvolve mídia no jornalista iha nivél internasional.
“AJTL nomea Sr. Virgílio Lamukan Guterres nu’udar ninia reprezentante ba CI tamba nia hanesan membru ativu AJTL nian ne’ebé durante ne’e reprezenta asosiasaun hodi promove dezenvolvimentu mídia no jornalizmu iha rejiaun sudeste Aziátiku no iha mundu”, dehan nia.
Nune’e, Prezidente AJTL ne’e husu ba Prezidente Parlamentu Nasional – PPN, Aniceto Guterres, atu lalika konsidera petisaun hosi grupu jornalista sira ne’ebé lidera hosi Noemio Falcao tanba viola dezisaun konferénsia AJTL iha loron 04 Jullu 2020.
“Parlamentu Nasionál atu lalika tau iha kosiderasaun petisaun ne’ebe Noemio Falcao ho ninia grupu submete tamba viola desizaun konferénsia AJTL nian ne’ebé realiza iha 4 Jullu 2020 hodi hili Membru AJTL, Virgílio “Lamukan” Guterres atu sai nu’udar membru Conselho de Imprensa periódu 2020 – 2024”, dehan Zevonia.
Husu públiku atu lalika fiar grupu petiesionáriu Neomio Falcao ne’ebé dehan katak konferensista ho totál númeru 256 ne’ebé mak vota iha eleisaun konferénsia nian ne’e, mairoa la’ós jornalista.
Tanba, nia klarifika tan, konferensista sira ne’ebé vota ne’e legál no lejitimu tamba hetan aseitasaun maioria husi konferensista sira. Noemio ho ninia grupu tuir loloos kestiona mós prosesu eleisaun iha ninia asosiasaun rasik tamba uza kritériu ne’ebé hanesan.
Nia kontinua, husu mós ba membru AJTL sira atu kalma hodi kuidadu ho grupu jornalista ne’ebé sai hanesan ajente partidu hodi influensia jornalista sira ba sira nia interese. Nune’e mós bolu atensaun ba membru AJTL ne’ebé asina petisaun atu labele hatama tan kanuru tohar iha asosiasaun nian tanba hanesan ema traidor ba AJTL.
“Membru AJTL hotuhotu atu matan-moris no neo-nain tamba ajente partidu polítiku sira nian hahú infiltra tama iha asosiasaun jornalista nia leet hodi influénsia membru sira atu tama iha sira nia lasu polítika. Husu membru AJTL balu ne’ebé karik asina mós petisaun ne’e, di’ak-liu sees dadauk ona husi asosiasaun ne’e tamba aktu ne’ebé ita-boot sira halo ne’e nu’udar traisaun boot ba AJTL hanesan organizasaun no ninia prinsípiu sira”, katak nia.
Antes ne’e, iha loron, (09/07), Noemio Falcao, lori ona petisaun ne’ebé hetan asinatura hosi jornalista hamutuk 31 ba PPN, Aniceto Guterres, ne’ebé kestiona legalidade rezultadu konferénsia AJTL hodi hili Virgílio da Silva Guterres “Lamukan” hodi reprezenta ba CI. (Editór, Guido Santos)
