Covalima-SMI: Diretúr Dirasaun Rejistu Sivil no Notariadu ( DRCN sigla portugués) Munisípiu Covalima, Antonio Sarmento, hateten, kestaun orsamentu ne’ebé la sufisiente fó impaktu ba manutensaun kareta Estadu ne’ebé avaria ona durante tinan rua nia-laran.
“Ha’u mós laiha orsamentu atu hodi halo manutensaun ba kareta ne’e, ha’u hanoin persiza atu hadi’a kareta ne’e para bele utiliza hodi hala’o sevisu hanesan fali uluk”, dehan Antonio Sarmento, ba SMI iha nia Serbisu fatin, Segunda, (13/07).
Tuir Diretúr Antonio, kareta Estadu ho matrikula 03-132G no marka Hilux hosi DRCN munisípiu Covalima ne’e avaria dezde tempu diretúr sesame Lino do Nascimento ne’ebé to’o ohin loron seidauk halo manutensaun, maske parte DRCN presiza tebes transporte atu uza ba halo serbisu.
“Kareta ne’e hahú avaria kedas iha tempu diretúr sesante nia tempu. Iha ha’u nia tempu ne’e ha’u atu halo munutensaun ba kareta Hilux ne’ebé avaria durante Tinan naruk nia laran ne’e maibe, ha’u mós laiha osarsamentu atu hodi halo manutensaun ba kareta ne’e”, katak nia.
Diretúr ne’e esplika, durante ne’e parte DRCN munisípiu Covalima hetan dezafiu hodi hala’o serbisu relasiona ho laiha transporte.
Tan-ne’e, nia husu ba Governu sentral atu bele toma konsiderasaun hodi koloka orsamentu manutensaun nune’e bele hadi’a lalais iha tempu badak nia laran.
“Durante ne’e difikulta ami nia servisu mak transpotasaun ne’e de’it, tanba ne’e mak ha’u husu ba ita nia governu sira bele tau netik konsiderasaun masimu ba hodi hadi’a kareta ne’ebé aat, ha’u sujere mós atu bele hadi’a lalais hodi nune’e ami bele utiliza hodi hala’o servisu iha Munisípiu ne’e ho di’ak”, tenik nia.
Relasaun ho kareta Estadu parte DRCN ne’ebé sei avaria, Diretúr atúal, Antonio Sarmento kontinua uza ninia kareta privadu hodi hala’o serbisu Estadu iha nivél munisípu no nasional. (Editór, Azitho Soares)
