Díli-SMI: Reprezentante Primeiru Ministru, Julío Sarmento “Meta Malik”, deklara, VIII Governu konstitusional ne’ebé lidera hosi Primeiru Ministru, Taur Matan Ruak, sei fó apoiu masimu ba Centro Nacional Chega – CNC iha prezervasaun memoria konfilitu pasadu ne’ebé akontese iha tinan 1974, 1975 to’o 1999.
Nune’e, liu-hosi diskursu iha aniversariu CNC ba dala-3, Julío Meta Malik, husu ba parte CNC presiza halo programa ka dezeñu planu atividade kona-ba prezerva memoria konflitu pasadu nian, iha ambítu luta libertasaun nasionál hosi tinan 1974 to’o tinan 1999.
“CNC presiza dezeña atividade no programa prezerva, tau-matan no kuidadu memoria pasadu iha ambítu luta ba libertasaun nasionál hahú tinan 1974 to’o 1999”, dehan, Meta Malik.
Maibe, membru Governu ne’e, haforsa, ho prezerva memoria pasadu la’os atu hamosu odiu vigansa ne’ebé bele hamosu konflitu iha futuru.
Asaun prezerva memoria konfilitu pasadu ne’ebé ho inisiativa ka esforsu atu promove paz no rekonsiliasaun.
Iha parte seluk, Diretúr Ezekutivu CNC, Hugo Maria Fernandes, agradese ba polítika VIII Governu konstitusional ne’ebé kontinua tau perioridade no konsidera rekomendasaun sira hosi Chega nian.
“Hato’o ha’u nia gratidaun ba na’i primeiru minstru VIII Governu konstitusional ne’ebé adopta mós rekomendasaun Chega ba tinan lima ho liña jerál CNC nian”, katak, Hugo Fernandes.
Durante mandate CNC hala’o ona mapamentu ba fatin istóriku sira iha munisípiu neen (6). Inklui halo mós prezervasaun memoria ema nian ho suku sira, liu-liu suku ualu (8) iha sidade Díli.
Nia, hatutan, CNC mós halo ona programa ida ne’ebé hanaran komunidade ida ho istória ida.
Marka prezensa iha aniversariu CNC ne’e, Ministru Asuntu Kombatente Libertasaun Nasionál, Julío Sarmento “Meta Malik”, Ministru Asuntu Parlamentares no Komunikasaun Sosiál, Francisco Jeronimo, Ministru Turizmu, Komersiu no Industria, Jose Lucas, Ministru Edukasaun, Joventude no Disportu, Armindo Maia, korpu diplomatiku, Asosiasaun Vitima, Subrevivente no konvidadu sira seluk. (Editór, Francisca Costa).
