Díli-SMI: Diretúr Ezekutivu Centro Nacional Chega – CNC, Hugo Maria Fernandes, hatete, CNC sei kontinua esforsu hodi prezerva memoria pasadu liu-hosi asaun tau-matan ba fatin istóriku sira inklui promove rekonsiliasaun no paz iha rai-laran tuir mandatu CNC nian.
"Tuir Dekretu Lei Númeru 48/2016, liu-hosi liña jerál orientasaun politiku governu nia hodi fó ba iha CNC mak hanesan prezerva memoria pasadu no promove rekonsiliasaun no paz iha Timor-Leste ho ONU, tau-matan no bali didiak fatin historiku sira”, dehan, Hugo Fernandes, durante ninia diskursu iha loron aniversariu CNC ba dala 3, iha eis Komarka Balide, Sexta, (17/07).
Hugo Fernandes, informa, durante tinan 3 mandatu CNC hala’o ona atividade lubuk ida iha rai-laran no rai-liur hodi fahe esperénsia Timor-Leste nia kona-ba rekonsiliasaun.
Hanesan iha tinan 2019, Embaxada Australia fó biban ba CNC hodi hala’o misaun importante ida iha sidade Australia inklui mós iha Indonézia hodi fahe informasaun kona-ba esperénsia Timor-Leste relasaun ho rekonsiliasaun nian.
“Iha tinan kotuk (2019) Embaxada Australia fó oportunidade ba CNC, hala’o jornada iha sidade hotu iha Australia, fahe esperénsia timor nian kona-ba rekonsiliasaun. Partilla esperénsia timor ho kolega sira iha Indonézia. Katak, Hugo.
Reprezentante Estudante Esternatu São José, Felisia Guerra Araújo, komenta, prezervasaun memoria pasadu ne’e importante ba jerasaun foun liu-liu estudante sira atu bele estuda maka’as hodi hetan esperénsia, atu dezenvolve nasaun ida-ne’e.
“Hanesan jerasaun foun, importante prezervasaun istória atu jerasaun foun bele apriende no estuda, hetan esperénsia foun hosi istória pasadu hodi dezenvolve Timor-Leste ho di’ak”, dehan Felisia.
Relasaun ho asuntun prezervasaun memoria pasadu nian, Ministru Asuntu Kombatente Libertasaun Nasional, Julío Sarmento “Meta Malik”, afirma, durante ninia mandatu Governu sei halo parseiru di’ak ho parte CNC hodi asegura no prezerva memoria konflitu pasadu iha tinan 1975 to’o 1999. (Editór, Guido Santos).
