Lospalos-SMI: Durante tinan barak nia laran estudante sira iha Eskola Báziku Filial Númeru 2 Lospalos Villa tuir atividade apriendezajen iha kondisaun uma ne’ebé at loos hanesan kalen iha uma kakuluk balun monu sai ona, plafon at hotu no aula ne’ebé favoravél atu uza ba prosesu apriendezajen.
Diretóra EBF Nú. 2 Lospalos, Filomena Fernandes Cabral, esplika, estudante sira kontinua uza fatin ka aula sira maske grave no at loos durante tempu naruk nia laran tanba laiha orsamentu atu rehabilita eskola refere.
"Kondisaun EBF Nú. 2 de Lospalos at durante tinan naruk Nia laran ona, maibe to'o agora seidauk bele hetan rehabilitasaun hosi parte kompetente, tamba orsamentu laiha”, dehan Filomena Cabral, ba jornalista SMI, iha ninia serbisu fatin EBF Nú. 2 Lospalos, Tersa, (21/07).
Diretóra ne’e hatutan, tuir loloos parte Edukasaun munisípiu Lautém tau ona perioridade ba kondisaun eskola refere, realidade to’o ohin loron seidauk iha informasaun ruma kona-ba rehabilitasaun eskola refere.
Relasiona ho Governu ninia resposta ne’ebé neneik, parte eskola tau ona planu atu halo enkontru ho estudante sira inan-aman estudante iha tempu badak hodi bele buka solusaun ba rehabilitasaun eskola ne’e.
“Tuir lolos problema ne’ebé EBF nú. 2 Lospalos infrenta ne’e kompeténsia Governu no Estadu nian, maibe too agora laiha atensaun ruma. Tan-ne’e ba tinan ida ne’e parte eskola sei realiza enkontru ida ho inan aman sira, nune’e bele tau ideas hamutuk oinsa atu bele hadia uma eskola ne’ebe a’at kuaze tinan lima ona ne’e”, tenik nia.
Relasiona asuntu refere, Xefe Departementu Infra-estrutura Edukasaun Munisípiu Lautém, Tito Lopes, afirma, rekuiñese kondisaun eskola refere no hato'o ona planu ba Ministériu Eduksaun, liu-hosi Diresaun Nasional Infra-estrutura maibe tanba situasaun impase polítika iha rai-laran nune’e seidauk bele halo rehabilitasaun.
"Kondisaun EBF nú. 2 Lospalos ne'e Edukasaun Diresaun infra-estutura Munisípiu halo ona planu, iha tinan 2017-2018, maibe tanba situasaun polítika iha rai-laran planu hirak ne'e labele realiza”, katak, Tito.
Maske nune’e, parte Edukasaun Dirasaun Infra-estrutura Munisípiu Lautém iha optimista katak planu rehabilitasaun eskola refere sei akontese iha tinan 2021. (Editór, Guido Santos).
