Lospalos-SMI: Komunidade no joventude aldeia Asalaino, Suku Fuiluro, Postu Administrativu Lospalos, Munisípiu Lautém halo esforsu organiza feira hodi komemora loron Falintil 20 Agostu no loron Konsulta Popular 30 Agostu maibe parte Administadór rasik laiha informasaun serteza kona-ba apoiu feira ne’e rasik.
Administradór Munisípiu Lautém, Zeferino dos Santos Sequeira, fó razaun katak simu ona karta pedidu hosi joventude aldeia Asalaino ne’ebé kria inisiativa atu loke feira maibe seidauk bele fó resposta tanba presiza hetan autorizasaun hosi komisaun feira nasionál nian.
“Rekuiñese karta pedidu ne'ebé mak juventude sira Haruka ba adminitrasaun Lautém ho inisiativa loke feira iha Aldeia Asalaino ne'e, maibe seidauk serteza ga klaru tamba sei (hein) autorizasaun hosi Komisaun nasionál”, dehan Zefereno dos Santos, ba SMI iha nia serbisu fatin, Kuarta, (22/07).
Zeferino, afirma, atividade feira ne’ebé komunidade no joventude aldeia Asalaino atu organiza presiza kordena ho parte instituisaun Polísia Nasional Timor-Leste – PNTL munisípiu Lautém nian.
“Feira ne'ebé (atu) realiza iha aldeia Asalaino ne'e tama ba fulan Agostu mak foin iha informasaun loloos, tanba tenke iha mós kordenasaun hosi Komandu Polísia Munisípiu Lautém.
Maske nune’e, parte joventude Asalaino dadaun ne’e halo ona preparasaun hodi organiza atividade feira hodi komemora loron Falintil 20 Agostu no loron konsulta popular 30 Agostu tinan ida-ne’e.
Prezidente Xefe Sentru Joventude Aldeia Asalaino, Jorge da Costa, esplika, komunidade no joventude dadaun ne’e organiza an ona hodi realiza feira refere nu’udar parte ida hodi kontribui paz no dezenvolvimentu iha suku Fuiluro.
“Juventude iha aldeia Asalaino komesa organiza an, iha tempu pasadu ne’e sai hanesan istória komesa ba oin Sentru Joventude Asalaino sei Kontribui ba paz ho dezemvolvimentu, tanba joventude mak sai autór ba buat hotu, nune'e ba oin joventude Asalaino hakarak Kontribui ba paz iha munisípiu Lautém”, katak nia.
Ho selebrasaun loron istóriku rua ne’e bele inspira joventude sira iha aldeia Asalaino, suku fuiluro no jeralmente joventude iha Postu Administrativu Lospalos hodi kria ambiente paz no hakmatek iha komunidade nia-leet.
Antes remata entrevista, líder joventude ne’e, esplika, relasaun ho feira refere, ninia parte hatama ona mós karta pedidiu ba gabinete interminsterial no Komandu Falintil-Forsa Defeza Timor-Leste – F-FDTL. (Editór, Rui Santos).
