Lospalos-SMI: Relasiona ho kondisaun estrada ligasaun entre suku Home ho Postu Administrativu Lospalos ne’ebé durante ukun-an to’o ohin loron sei at nafatin prejudika ba movimentu komunidade suku Home atu asesu merkardu hodi faan sira nia prodútu lokál.
“Estrada diresaun suku Home, tinan ba tinan ho kondisaun grave tebes no susar komunidade sira lori prodútu lokál ba asesu merkadu”, katak, Xefe Departementu Estrada Munisípiu Lautém, Benedito Belo, iha Serbisu fatin, Hama-Moko, Lospalos, Kuarta, (29/07).
Maibe, dadaun ne’e estrada maizumenus liu kilometru 2 ligasaun suku Home ho Postu Administrativu Lospalos hahú ona halo rehabilitasaun hosi kompañia Pay-Hara Lda.
Konstrusaun estrada refere bázea ba orientasaun hosi Ministériu Obras Públikas Diresaun munisipiu Lautém ne'ebé servisu humutuk Road For Development - R4D no parseira ho The International Labour Organization - ILO.
"Rehabilitasaun estrada kuaze 2,5 kilometru no kompletu ho konsrrusaun, hanesan ponte ho valeta", tenik nia.
Wainhira husu kona-ba garante kualidade estrada, Xefe Departementu Estrada munisípiu Lautém, afirma, relasaun ho kualidade rehabilitasaun estrada sei garante hanesan estrada iha suku seluk ne’ebé halo ona rehabilitasaun dahuluk.
“Kona-ba kualidade estrada ne'e garante, nia kualidade hanesan estrada sira seluk, iha Laivai, Daudere, Luro nian, sira ne'e mai implemeta iha suku Home, Nune'e ba kualidade sei laiha difikuldade”, katak nia ho fiar-an.
SMI koko totál orsamentu ba rehabilitasaun estrada ligasaun suku Home ho Postu Administrativu Lospalos, Benedito, esplika, tuir estimasaun orsamentu rehabilitasaun estrada liu $.500.000,00 USD. (Editór, Rui Santos).
