Díli-SMI: Manifestante kontra esbosu Lei Kriminaliza Defamasaun ne’ebé kompostu hosi movimentu universitariu, asosiasaun jornalista, organizasaun sosiadade sivil konsidera Governu nia polítika kriminaliza defamasaun hanesan aktu ida atu hamate domokrásia iha Timor-Leste.
Presidente Asosiasaun Jornalista Timor-Lorosa’e – AJTL, Zevonia Vieira, hatete, desde inísiu VIII Governu konstitusional hamosu esbosu kriminaliza defamasaun, AJTL rasik kontesta ona tanba konsidera bele hamate demokrásia iha Timor-Leste.
“Hahú kedas wainhira hamosu Lei kriminalija Defamasaun AJTL reseita total, tanba uluk Ita nia Maun bot Sira Nia luta, uza liberdade imprensa hodi kontra okupasaun Indonézia ohin loron Ita hetan ukun rasik an”, dehan Zevonia, durante hala’o orasi iha asaun pasiku ne’ebé mak hala’o, edifisiu UNTL Liceu, Díli, (Segunda, 03/2020).
Zevonia, argumenta, esbosu Lei Kriminaliza Defamasaun hosi Governu ne’e wainhira implementa sei fó ameasa ba indeks prestasaun Liberdade imprensa Timor-Leste nian iha Sudeste Aziatiku.
"Ita hatene katak ita nia konstituisaun RDTL artigu 40 no 41 fo liberdade imprensa no mós fó liberdade espresaun ba ita hotu. Iha sudeste Aziatiku Timor-Leste hetan indeks rengkin 1 ba iha liberdade imprensa signifika ita iha demokrasia ne’ebé diak liu”, dehan nia.
Nia mós konsidera esbosu LKD ne’e aprova no implementa mak jornalista sira mós sei sai alvu halo atividade investigasaun nian.
Iha fatin hanesan, Diretúr Ezekutivu FONGTIL, Daniel Santos do Carmo, esplika, esbosu LKD ne’e atu asegura de’it Governante sira nia an hodi labele hetan kritika hosi públiku.
“Ministru justisa inkapasidade, tanba tau intrese maka’as liu, esbosu lei kriminalizasaun defamasaun ne’ebé implementa atu hodi asegura governante sira nia aan”, dehan Daniel.
Tuir Daniel, sei iha lei seluk ne’ebé importante liu ba povu no nasaun kompara ho lei kriminaliza defamasaun ne’e rasik.
“Lei Bems e Imoveis kona-ba lei terras propriadades, ministru justisa la elabora lei hirak ne’e, maibe ministru justisa tau interese liu-ba esbosu lei kriminalizasaun defamasaun”, katak nia.
Tuir observasaun SMI, asaun pasifiku kontra LKD ne’e partisipa masimu hosi organizasaun sosiadade sivil, asosiasaun jornalista, movimentu universitariu no seluk-seluk tan. (Editor, Guido Santos).
