Díli-SMI: Banku Nasional Sentral Timor-Leste – BNCTL (sigla-portugez) fó ona apoiu kreditu ba kliente hamutuk ema rihun lima resin (kliente 5000-resin) dezde tinan 2002 to’o ohin loron liu-liu iha area negósiu ki’ik no agrikultór sira.
“Kliente hirak ne’e mak BNCTL fó apoiu kreditu ba kliente sira hodi hadi’a sira nia moris. Alende ne’e mós, kliente ne’ebé hetan kreditu hamutuk rihun lima resin maka asesu ba kreditu hosi BNCTL, BNCTL fó kreditu ba kliente sira hahú hosi tinan 2002 to’o agora”, dehan Diretúr Ezekutivu BNCTL, Brigidio de Sousa, iha Timor Plaza, Tersa, (04/08).
Diretúr Ezekutivu BNCTL, Brigidio de Sousa, esplika, apoiu kreditu ne’ebé BNCTL durante tinan 18 nia laran oferese mak apoiu iha area negósiu ki’ik sira nomós agrikultór nian.
"BNCTL fó kreditu ba kliente sira ne’ebé moris hosi mikro pequenas mak hanesan kliente ne’ebé kuda modo, loke restaurante ki’ik, loke kios, loke karpintaria, inklui mós kliente ne’ebémoris ho vida agrkultór hanesan agrikultór ne’ebé kuda kafe, halo natar, no halo-toos”,
Brigidio, hatutan, montante kreditu ne’ebé BNCTL fó ba kliente hamutuk rihun 5 resin ne’e ho montante orsamentu ne’ebé diferente bázea ba pedidu kliente sira nian.
“BNCTL fó kreditu ba kliente sira ho montante osan hamutuk Dollar Atus Rua to’o Dollar Atus Lima ba leten”, katak nia.
Nia mós klarifika, seluk hosi kliente hosi negósiu ki’ik no agrikultór ne’ebé hetan kreditu hosi BNCTL, durante ne’e mós fó ona kreditu ba emprezariu sira iha rai-laran.
Mekanizmu kreditu ba emprezariu sira nafatin ho kritéria kreditu ne’ebé aplika ba kliente iha area mikro pequena no agrikultór sira nian.
Nia afirma, parte BCNTL sei kontinua fasilita kreditu ba komunidade sira ne’ebé hakarak halo negósiu ka investe iha area agrikultór hodi nune’e bele dezenvolve di’ak liu-tan ekonómia iha rai-laran. (Editór, Rui Santos).
