Díli-SMI: Governu Australia liu-hosi Programa Koperasaun Defeza (DCP-sigla Inglés) milítar Australia kontinua apoiu formasaun hodi hasa’e abilidade membru FALINTIL-Forsa Defeza Timor-Leste – F-FDTL iha area tiru kilat nian.
Tuir publikasaun iha pajina ofisial Embasada Australia iha Timor-Leste, deskreve, treinamentu tiru kilat ne’e importante tebes hodi hasa’e abilidade membru F-FDTL nian liu-liu Komponente Apoiu Kombate nian.
“Tiru kilat presiza prátika bebeik, no soldadu sira hosi Komponente Apoia Kombate (sigla Inglés: CAS) foin dadauk hala’o treinu tiru nian iha fatin tiru iha Metinaro hodi aplika sira nia abilidade tiru nian”, hatete, iha pajina ofisial Embasada Australia, ne’ebé redasaun SMI asesu foin lalais ne’e.
Iha treinamentu tiru kilat ne’e fasilita hosi komponente tiru hodi intróduz ba membru milítar ne’ebé tuir treinu kona-ba sistema elektrónia foun marka tiru nian.
“Ekipa treinamentu ba armas ki’ik hosi komponente treinu nian (CFeT) fornese ona treinamentu ba arma ne’ebé importante no introdúz mós ba soldadu sira kona-ba sistema eletrónika foun ba marka tiru”, esplika iha pajina ofisial refere.
Ho sistema elektrónika foun ne’e atu bele ajuda treinador sira bele hatene lalais rezultadu tiru hosi membru F-FDTL ne’ebé halo treinu tiru kilat.
“Sistema ida ne’e tulun treinadór no hirak ne’ebé tuir treinu hodi bele haree rezultadu ho lais no aprende hosi rezultadu ne’e”, deskreve iha pajina ofisial embasada Australia nian.
Iha publikasaun ofisiál ne’e mós relata Governu Australia ninia komitmentu atu kontinua apoiu dezenvolve kapasidade tekniku tiru nian ba membru F-FDTL iha futuru. (Editór, Francisca Soares).
