Díli-SMI: Sekretária Estadu ba Igualdade no Inkluzaun – SEII kordena hamutuk parte Ministériu Edukadaun Joventude no Disportu – MEJD hala’o sorumutuk hodi diskute kona-ba koperasaun hamutuk ba asuntu igualdade no inkluzaun liga ho asuntu promosaun jéneru nian.
Sekretária Estadu ba Iguladade no Inkluzaun – SEII, Maria José da Fonseca, esplika, objetivu hosi sorumutu ho MEJD, Armindo Maia, diskute kona-ba oinsa bele elabora polítika atu garante labarik feto sira ne’ebé fila hikas ona ba eskola.
“Sekretária Estadu hato’o kona-ba oinsá MEJD bele elabora polítika fila hikas ba eskola hodi asegura labarik feto sira bele fila hikas ba eskola bainhira sira para eskola ho razaun saida de’it no SEII prontu kolabora hodi fó apoiu tomak ba prosesu dezenvolve polítika ne’e”, dehan SEII, Maria da Fonseca, iha Vila Verde, Segunda, (10/08).
Nune’e mós durante sorumutu entre SEII no MEJD diskute kona-ba asuntu importante sira mak hanesan asédiu seksuál no polítika zero toleránsia ba violénsia iha eskola.
Inklui asuntu planu asaun anuál MEJD nia oinsa bele tau konsiderasaun ba Governu hodi asegura orsamentu ba sensivel jenéru liga kriasaun fasilidade ne’ebé diak hodi labele hamosu diskriminasaun entre estudante sira iha eskola.
“Haklean (diskute) kona-ba asuntu sira hanesan; asédiu seksuál, polítika zero toleránsia ba violénsia iha eskola inklui planu asaun anuál (PAA) MEJD nian atu bele asegura orsamentu sensivel ba jéneru hodi bele kria fasilidade ne’ebé di’ak iha eskola sira ba labarik feto no maluk sira ho defisiénsia bele asesu”, dehan nia.
Durante enkontru, parte SEII mós entrega dokumentu importante ida kona-ba mata-dalan ka Plataforma polítika serbisu ne’ebé hala’o tiha ona liga ho asuntu promosaun igualdade no inkluzaun nian. (Editór, Francisca Soares).
