Covalima-SIMI: Kuaze tinan ida resin ona auto-estrada ne’ebé konstrui ho orsan boot iha suku Debos no Labarai, Postu Administrativu Suai Vila Munisípiu Covalima, hetan estraga hosi inundasaun no rai-halai hodi taka estrada maibe to’o ohin loron Governu la preokupa hodi suru sai fatuk no rai-henek iha auto-estrada refere.
Administradór Munisípiu Covalima, Afonso Nogueira, sente la-sastifas ho situasaun auto-estrada refere tanba fó impaktu ba movimentu komunidade la’o ba mai liu-liu transporte publiku atu liu hosi area Suku Ogues Ranoc ba Suku Debos Tali Oan.
“Rai monu ne’e tanba kausa hosi udan-boot hodi taka auto-estrada no transporte labele liu-hosi area Suku Ogues Ranoc mai Suku Debos Tali Oan”, dehan, Afonso Nogueira, ba SMI iha ninia serbisu fatin, Segunda, (17/08).
Administradór ne’e, afirma, Governu hanesan Ministériu Obras Públikas – MOP presiza tau atensaun ba situasaun auto-estrada refere hodi nune’e bele responde ba preokupasaun komunidade ne’ebé kestiona utilidade auto-estrada nian.
“Seidauk hadi’a, (ne’e) responsabilidade Ministériu Obras Públikas nian. Iha munisípiu hanesan Administradór hato’o de’it komunidade no joventude nia preokupasaun atu nune’e (MOP) bele toma atensaun ba auto-estrada refere”, katak, Afonso.
Liga ho kestaun refere, Diretúr MOP, Munisípiu Covalima, Alberto Cardoso, halo klarifiksaun ne’ebé koko ses-an hosi ninia responsabilidade, maske iha kompeténsia atu relata situasaun hirak ne’e mai Governu sentral atu tau atensaun ho urjente.
“Ha’u nu’udar Diretúr iha munisipál ninian ha’u sei laiha kompenténsia atu foti desizaun ba perokupasaun sira ne’ebé hato’o hosi Administrador Municipio kona ba iha fulan kotuk udan bo’ot inundasaun halo rai monu hodi taka dala auto-estrada no labele halo movimentu liu ba mai iha dalan refere”, dehan nia
Diretúr ne’e, hatutan, parte MOP iha nasional tau ona planu atu halo manutensaun ka suru sai rai-henek no fatuk ne’ebé taka estrada maske nia rasik la esplika loron no fulan ne’ebé fiksu atu hadi’a auto-estrada ne’ebé hetan estraga hosi inundasaun refere.
“Ami hanesan Obras Públikus iha Munisípal ami mos sempre servisu hamutuk ho Obras Publiku iha nasional, maibe ba kestaun ba inudasaun ne’e, agora dadaun sira hosi diresaun nasional iha ona planu atu hasai rai hirak ne’ebé taka hela dalan iha Auto Estrada ninian”, tenik nia.
Atu remata entrevista, Diretúr MOP, argumenta, karik auto-estrada refere sei hetan manutensaun ka hasai rai-henek no fatuk ne’ebé taka estrada wainhira Governu aprova ona Orsamentu Jerál Estadu – OJE 2020 iha fulan oin.
“Ba inundasaun hirak ne’e ita hein Orsamentu Jerál do Estadu ne’e aprova ona entaun ita bele suru sai iha tinan ne’e laran, maibe OJE mak seidauk hetan aprovasaun hosi ita nia Gevernu entaun bele mos ita hein to’o tinan 2021 oin mai mak ita bele hasai rai hirak ne’e”, katak, Alberto Cardoso.
Tuir observasaun SMI durante ne’e hatudu katak auto-estrada refere sempre hetan estraga hosi inundasaun wainhira tempu udan.(Editór, Guido Santos).
