Ataúro-SMI: Movimentu transaksaun ilegál ne’ebé kontinua buras iha area entre Illa Ataúro no Liran – Indonézia sai preokupasaun komunidade no autoridade lokál iha Postu Administrativu Ataúro, Munisípiu Díli hodi ejize ba Governu atu monta postu seguransa marítima iha area refere.
Xefe suku Bikeli, Daniel Martins, afirma, Governu presiza monta postu seguransa marítima iha fronteira entre illa Ataúro – Timor-Leste no Liran – Indonézia hodi evita movimentu ilegál sira ne’ebé bele fó ameasa ba komunidade sira liga ho asuntu COVID-19 nian.
“Postu vizilansia ba seguransa iha area fronteira marítima importante ba komunidade fronteiriza tanba durante ne’e sempre fó amesa ba movimentu transaksaun ilegál sira ne’ebé iha, tanba foin lalais sidadaun hosi Ataúro sei kontinua hala’o movimentu ba Lirang-Indonézia maske ita iha hela estadu emergensia-ba prevensaun covid-19”, dehan, Daniel Martins, ba SMI iha ninia serbisu fatin, Segunda, (17/08).
Nune’e, líder komunitáriu ne’e husu ba parte Governu liu-hosi Ministériu Interior atu bele instala postu Unidade Polísia Marítima – UPM iha aldeia Waruana – Akrema, Suku Bikeli, hodi bele evita ba movimentu ilegál ne’ebé bele hamosu transmisaun lokál COVID-19.
“Presiza atu kria postu seguransa vizilansia hodi apoiu lideransa komunitaria ba prevensaun COVID-19 nian”, katak nia.
Razaun fundamentu hosi ejizensia líder komunitariu ne’e bazeia ba faktu no esperensia kona-ba movimentu tama-sai fronteira no atividade ilegál entre area Ataúro no Liran - Indonézia durante ne’e.
Tanba, Xefe suku Bikeli, hatutan, foin-lalais ne’e komunidade hetan atividade movimentu ilegál iha area fronteira entre aldeia Waruna-Ataúro ho Liran - Indonézia.
“Atu labele fó sala bebeik ba komunidade iha liña fronteira di’ak liu kria postu vizilansia hodi (evita) movimentu ilegál sira ne’e”, tenik nia.
Ejizensia hanesan mós mai hosi komunidade aldeia Waruna, suku Bikeli, Filípe Gusmão, katak, Governu sentral tenke establese lalais postu seguransa marítima atu bele rezolve problema transaksaun ilegál ne’ebé durante ne’e akontese.
“Ami hakarak Governu kria postu seguransa, tanba durante ne’e iha ema ilegál ne’ebé sei kontinua hala’o atividade transaksaun ilegál”, dehan komunidade ne’e ho esperansa.
Responde ba ejizensia komunidade no autoridade lokál, Administrador Postu Ataúro, Mateus Belo, klarifika, liu-hosi enkontru munisípal nian foin lalais ne’e transmite ona ba Administradór Munisípiu Díli kona-ba asuntu refere.
“Liu-hosi enkontru munisípal ita submete ona karta ida ba munisípiu atu propoin ba Governu - diresaun kompotente atu toma medidas, ita hein katak tempu badak sei iha solusaun ba ida ne’e”, katak, Mateus Belo.
Administradór Postu ne’e, promete sei kopera ho masimu ba parte seguransa wainhira Governu sentral establese ona postu vizilansia seguransa marítima iha Ataúro.
Geografikamente, Fatu’u - Akrema no aldeia Waruana nu’udar viziñu ba illa Liran - Indonézia ne’ebé ho distansia maizumenus kilometru 30 hosi Postu Ataúro Villa durante ne’e sai fatin ba movimentu no transaksaun ilegál.
Tanba entre illa Lirang-Indonézia ho Aldeia Waruna - Ataúro, Timor-Leste ho distanisa maizumenu kilomentru 7 ho balu de’it, nune’e sai fatin ba movimentu ilegál ne’ebé buras tebes. (Editór, Francisca Soares).
