Manufahi-SMI: Estrutura Eskola Sekundaria Tékniku Vokasional Akadiruhun – ESTVA hamutuk ho komunidade husu responsabilidade Governu atu fó kontratu ba kompañia Aureda Unipessoal. Lda hodi aslera prosesu instalasaun eletrisidade ne’ebé hahú dezde 2017.
Porta Voz ESTVA, Manuel Sequeira Barreto, klarifika, projetu instalasaun eletrisidade ho distansia kilomentru haat (4) ne’e tama iha katégoria emerjénsia ne’ebé iha ona despxsu hosi Governu ho Nú 16/6/2017 maibe to’o ohin loron seidauk implementa projetu refere.
“Ami hosi Escola ESTV Akadiruhun ho komunidade sira hato’o ba Governu atu autóriza kompañia Aureda Unipessoal. Lda ne’ebé simu tiha ona despaxu hosi VI Governo konstituisional ho Nú. 16/6/ 1/2017 liu-hosi Vise Ministériu Obras Publiku iha tinan 2017 hodi halo instalasaun ba eletrisidade hosi loja Manufahi to’o eskola ESTVA Akadiruhun ho totál kilometru haat(4) katégoria emerjénsia no presiza finaliza iha tinan 2017, maibe to’o oras ne’e seidauk iha koneksaun”, dehan, Manuel Sequeira, ba SMI iha ninia serbisu fatin foin lalais ne’e.
Durante hato’o lamentasaun, Manuel Barreto, esplika, ESTVA no komunidade iha aldeia Rialau, suku Letefoho, Postu Administrativu Same, Munisípiu Manufahi ne’e, iha tinan barak nia laran labele asesu eletrisidade hodi uza ba nesesidade eskola nian tanba prosesu instalasaun ne’ebé paradu to’o ohin loron.
Liga ho fasilidade eletrisidade ne’ebé seidauk tama iha area eskola nian prejudika ba prosesu aprendijazen liu-liu wainhira estudante sira atu halo prátika relasaun ho materia sira ne’ebé mestre oferese.
Nune’e, nia, hatutan, wainhira estudante sira atu halo prátika tenke uza komunidade nia uma ne’ebé asesu ona eletrisidade, estudante sira la’o ain ho distansia dook tebes.
“Susar tebes ba estudante sira atu hala’o aulas pratika iha eskola relasiona ho disiplina ne’ebé estudante sira hetan hosi korikulu nasional ESTVA nian. Durante ne’e prosesu ensinu aprendijazen labele la’o ho masimu tamba estudantes sira tenke la’o ain ho distansia kilometru hat (4) hodi ba tuir aula pratika iha komunidade nia uma ne’ebé asesu ona liña eletrisidade ne’ebé oferese gratuita ba estudante sira sai hanesan laboratorium ba prátika nian”, katak nia.
Kabe ho kestaun refere, Diretur Kompañia Aureda Unipessoal Lda, Luis da Costa, rekuiñese katak kompañia simu duni ona despaxu hosi parte Governu liu-hosi Obras Publikas no Ministériu Edukasaun maibe labele halo instalasaun eletrisidade tanba seidauk asina kontratu ruma.
“Ami seidauk halo koneksaun eletrisidade ba eskola ne’e, tanba kompañia rasik seidauk iha kontratu foun hosi EDTL tamba ne’e mak fó hela impaktu ba kompañia nia serbisu”, tenik nia. (Editór, Guido Santos).
