Díli-SMI: Ministra Negósiu Estranjeiru no Koperasaun – MNEK, Adaljiza Magno, prosesu Timor-Leste nia adezaun ba ASEAN la’o ona ba iha faze final, maibe presiza preparasaun di’ak liu-tan iha area ekonómia hanesan diversifikasaun ekonómia, proteze produsaun nasionál no loke an ba investimentu inklui seluk-seluk tan hodi nune’e bele priense ona rekezitu sai membru ASEAN nian.
“Adesaun ne’e nia preparasaun iha dalan-klaran ona. (Agora) preparasaun iha area ekonómia mak presiza hadi’a buat barak hanesan diversifikasaun ekonomia, proteze produsaun nasionál, nakloke ba investimentu no selu seluk tan”, dehan, MNEK, Adaljiza Magno, durante enkontru ho Prezidente Repúblika, Francisco Guterres “Lú Olo” iha Palásiu Prezidensiál, Bairru-Pite, Díli, Sesta, (21/08).
Durante enkontru, Adaljiza, informa, tama iha fulan Setembru ekipa avaliasaun ASEAN sei avalia preparasaun TL iha area sósiu-kultural no fulan Outobru ekipa kontinua halo avaliasaun iha area ekonómia nian.
Maske nune’e, Governante ne’e klarifika, mekanizmu avaliasaun ASEAN ne’e la’os hanesan tinan uluk ne’ebé ekipa mai direta iha TL, maibe sei liu-hosi telekonferénsia tanba ho razaun COVID-19.
“Iha fulan-setembru ekipa avaliasaun ASEAN sei halo avaliasaun ba preparasaun Timor-Leste iha area sosiu-kultural no iha fulan-outubru, ekipa refere sei halo avaliasaun ba area ekonómia.
“Avaliasaun ne’ebé ekipa ASEAN halo, la hanesan ho tinan kotuk, bainhira ekipa ne’e mai rasik iha Timor-Leste hodi halo avaliasaun kona-ba area polítika-seguransa, tinan ida ne’e, tan razaun Pandemia COVID-19, avaliasaun sei halo ho modu entrevista tuir telekonferénsia”, dehan, Adaljiza.
Iha parte seluk, Prezidente Repúblika, Francisco Guterres “Lú Olo”, husu ba MNEK halo serbisu maka’as liu-tan hodi kordena ho liña ministériu seluk atu konsentra iha area ekonómia, nune’e bele aslera lalais prosesu TL adezaun ba ASEAN.
Xefe Estadu ne’e, konkorda mós katak presiza diversifika ekonómia no halo investimentu ba area produtivu sira hodi bele reforsa pozisaun TL hanesan nasaun seluk iha rejiaun ASEAN.
“Importánsia diversifikasaun ekonómia rai-laran no investimentu iha seitór sira produtivu hodi hasa’e kapasidade Timor-Leste hodi hakbiit nia-an iha area hotu hodi hambriik hanesan ho nasaun seluk”, tenik, eis Prezidente Primeiru lejizlatura ne’e.
Iha okazian ne’e, atual Prezidente Repúblika ne’eapresia ba esforsu MNEK ne’ebé kontinua ho responsabilidade hodi lídera prosesu TL atu sai membru ASEAN. (Editór, Francisca Soares).
