Díli-SMI: Vise Ministru Interior, Antonio Armindo, esplika, Governu tau ona planu perioridade iha Orsamentu Jerál Estadu – OJE 2021 hodi harii postu 6 ba Unidade Patrollamentu Fronteira UPF inklui eskuadra polísia Comoro.
Planu hosi ministériu interior ne’e hetan ona apresiasaun hosi Primeiru Ministru, Taur Matan Ruak, hodi sai planu preoridade ba VIII Governu iha tinan oin mai.
“Primeiru-Ministru apresia tebes, konkorda ho dezeñu hirak ne’e i iha postu 6 que ita tenke halo iha 2021 hamutuk tan ho eskuadra Komoro. Postu 6 ne’e, 3 entre Mota-ain ho Salele no 3 entre Sakato ho Citrana iha Oekusi no ida tan mak ita-nia eskuadra Comoro ne’e prioridade ba iha 2021”, dehan, Antonio Armindo, iha Palásiu Governu, Kuarta, (26/08).
Razaun konstrusaun infra-estrutura ba polísia UPF ne’e bázea ba rezultadu monitorizasaun no identifikasaun hosi ekipa ministériu interior ho asesória tekniku hosi gabinete PM nian ne’ebé hala’o vizita ofisiál ba fronteira foin lalais ne’e.
“Ha’u hamutuk ho asesór Gabinete Primeiru-Ministru nian, ita aprezenta dezeñu kona-ba postu UPF nian ne’ebé maka foin daudaun ne’e ita la’o ba fronteira para identifika hela ne’ebé ohin tama ba iha faze dezeñu nian, dezeñu hotu ona ita aprezenta ona. Depois aban sei ba tan estasaun Comoro para atu haree took i para atu kompleta dezeñu hirak ne’e depois ita atu enkaixa ba iha orsamentu 2021”, dehan Vise Ministru Interior.
Nia, esplika liu-tan, iha fulan Jullu, simu orientasaun hosi xefe Governu atu hala’o vizita ba liña fronteira hodi nune’e bele halo identifikasaun ba postu UPF sira ne’ebé merese atu halo konstrusaun urjentemente, nune’e bele fasilira serbisu membru UPF iha terenu.
Tuir observasaun SMI hatudu katak infra-estrutura no fasilidade ba UPF sei menus tebes inklui eskuadra Comoro ne’ebé kada-tinan sempre hetan inundasaun wainhira tempu udan. (Editór, Francisca Soares).
