Díli-SMI: Ministru Obras Públikas – MOP, Salvador dos Reis Pires, informa, projetu kona-ba konstrusaun drenajen no saneamentu iha kapitál nasaun no sei gasta orsamentu hamutuk millaun $350 ne’e sei afeita uma-kain hamutuk 746 hosi postu administrativu 4 iha munsípiu Díli.
“Projetu ne’e sei afeita ba uma-kain hamutuk 746, uma-kain 141 hosi postu administrativu Nain Feto, uma-kain 121 hosi postu administrativu Vera Cruz, uma-kain 381 hosi postu administrativu Dom Aleixo, uma-kain 153 husi postu administrativu Kristu Rei”, dehan, MOP, Salvador Pires, iha Hotél Turizmu, Kinta, (27/08).
Relasaun ho implementasaun projetu refere, parte Governu liu-hosi Komisaun Avaliasaun Impaktu Ambientál – KAIA halo ona estudu ba impaktu ambientál iha fulan jullu nomós konsulta komunidade afeitadu sira hodi nune’e labele mosu impedementu wainhira implementa ona projetu.
“Governu halo ona servisu preparativus sira ne’e hanesan rekezitus ida ba iha projetu ida, atu nune’e konstrusaun ne’e labele fó fali problema sosiál seluk hosi investimentu ka konstrusaun ne’ebé Governu hakarak halo”, tenik, Salvador.
Hosi totál fundu ba projetu drenaijen no saneamentu ne’ebé tuir planu atu implementa iha 2022 ne’e mós hetan apoiu hosi Governu Estadus Unidus Amerika ho montante millaun $210 ba konstrusaun drenajen nian.
Fundu refere sei liu-hosi programa Compact Development Team -Timor-Leste -CDT-TL ne’ebé servisu hamutuk ho Millennium Challenge Corporation - MCC iha EUA ho objetivu atu bele kontribui ba kualidade saúde dezenvolve ekonómia iha rai-laran.
“Governu EUA atu ajuda liuhosi Compact Development Team -Timor-Leste (CDT-Timor-Leste) servisu hamutuk ho MCC iha Estadus Unidus, sira atu providénsia millaun $210 ba konstrusaun drenajen nian tanba ho hanoin katak atu kombate problema saúde atu bele kontribui ba sidadaun ne’ebé mais produtivu, kontribui ba dezenvolvimentu ekonómiku iha ita-nia rai-laran,” katak, Governante ne’e.
Liga ho asuntu indiminizasaun, iha opsaun rua mak prosesu indiminizasaun ba uma-kain ne’ebé sai afeitadu ba projetu refere bele mai hosi VIII Governu ka MCC hodi nune’e bele aslera lalais projetu refere.
Maske nune’e, estimasaun ba resentelmentu ka indiminzasaun ba komunidade afeitadu hosi projetu refere sei bazeia ba padraun ne’ebé Governu establese ona. (Editór, Caleri Alves).