Díli-SMI: Komandante Jerál Polísia Nasional Timor-Leste – PNTL, Komisáriu, Faustino da Costa, informa, durante fulan hitu (7) nia laran parte polísia tranzitu rejista maizumenus timoroan hamutuk ema na’in 39 mate tanba asidente tráfegu.
“Asidente trafegu ne’ebé akontese hosi fulan janeiru-31 jullu 2020, durante fulan hitu nia laran asidente tráfegu hamate ema na’in-39 iha territóriu nasionál”, dehan, Komisáriu, Faustino da Costa, iha Palásiu Prezidensiál Bairu-Pite, Kinta, (27/08) hafoin remata enkontru ho Prezidente Repúblika, Francisco Guterres “Lú Olo”.
Hosi totál ema mate iha asidente trafegu ne’e, parte polísia identifika hamutuk ema na’in 25 mak mate tanba hetan asidente tráfegu ho motor marka Beat.
No, ema na’in 29 mak laiha karta kondusaun maibe lori motor no kareta ne’ebé ikus mai hetan asidente tráfegu no mate.
“Hosi 39 ne’ebé mate, ema na’in-29 laiha karta kondusaun. Husi 39, na’in 25 mate tanba uza motor ho marka Honda Beat. Husi 39, na’n-5 iletradu”, katak, Komisáriu PNTL ne’e.
Tuir relatóriu investigasaun PNTL ne’ebé fó sai mídia nasional iha fulan Jullu no Agostu hatudu katak maizumenus ema na’in 7 mate tanba hetan asidente tráfegu.
Hanesan fulan Juñu, asidente tráfegu iha area One Dollar Beach – ODP ne’ebé rezulta vitima Francisco de Fátima (20) Soares no Lepolgido Ximenes (23) mate no kanek todan.
Relasiona ho faktu no dadus asidente tráfegu ne’ebé akontese, parte komandu PNTL sei kordena ho parte kompetente sira atu nune’e bele reduz númeru asidente iha futuru oin mai. (Editór, Caleri Alves).
