Manufahi-SMI: Premiadu Nobel da Paz, José Ramos Horta, soe-piada ba membru Parlamentu Nasional – PN sira ne’ebé moris goza ho saláriu liu $5000 kada-fulan maske serbisu mak hala’o vizita estranjeiru no rai-laran de'it, manorin-na'in sira kontinua serbisu voluntariu no la simu orsan maibe halo serbisu ho vontade hodi kontribui ba dezenvolvimentu edukasaun iha rai-laran.
José Ramos Horta, konsidera deputadu no deputada sira laiha vontade serbisu ba povu no gosta halo viazen ba estranjeiru de’it. Maibe kada fulan hetan orsan baran hodi sustenta moris kompara ho manorin-na’in sira gasta tempu hosi hanorin estudante sira kontinu serbisu ho voluntariu.
“Deputadu iha Díli sira nia servisu mak konta sai ba rai liur ho tama mai laran hodi manan ho osan sinku mill resin, maibe kuitadu profesár sira voluntariu ho osan laiha”,dehan, eis Prezidente Repúblika ne’e wainhira hala’o vizita ba Eskola Sekundaria Tékniku Vokásional Kombatente no Veteranu Manufahi - ESTV Covem, iha Postu Administrativu Same, Sesta, (04/09) semana kotuk liu-ba.
Eis diplomata ne’e, fó ninia agradesementu no apresiasaun ba manorin-na’in sira ne’ebé durante ne’e volunariamente hanorin ESTV Covem hodi fasilita estudante sira iha prosesu aprendizajen.
“Kuitadu profesór sira voluntariu ho osan laiha, sira iha vontade hodi kontribui nafatin ba buat sira ne’ebé sira hetan bele fahe fali ba estudante sira, tanba sira mak save ba nasaun no Dezemvolvementu nee timor nian”, katak, Horta.
Iha biban hanesan, líder nasional ne’e apresia no louva asaun kombatente no veteranu sira hosi munisípiu Manufahi ne’ebé ho inisiativa briliante hodi harii ESTV Covem atu fasilita povu nia ona iha seitór edukasaun formal nian.
“Ha’u fó parabens ba veteranus Manufahi ho hanoin ne’ebé di’ak hodi harii ona eskola hodi fasilita ita-nia estudante sira liu-hosi seitór edukasaun, tanba edukasaun hanesan dalan ne’ebé mak importante, sai hanesan save ba dezenvolvementu”, dehan, eis diplomata ne’e. (Editór, Caleri Alves).