Díli-SMI: VIII Governu ne’ebé lídera hosi Primeiru Ministru – PM, Taur Matan Ruak, liu-hosi reuniaun Konsellu Ministru - KM, Kuarta, (09/09) hodi deside ezenora, Daniel Marçal, hosi kargu Sekretáriu Ezekutivu Komisaun Nasional Kombate HIV-SIDA nian.
Projetu rezolusaun Governu kona-ba ezonorasaun Sekertáriu Ezekutivu HIV-SIDA, Daniel Marçal, aprezenta hosi Vise Primeiru Ministru, VPM, Armanda Berta dos Santos, hodi halo revogasaun ba rezolusaun Governu Nú. 2/2014 nian.
“Konsellu Ministrus aprova projetu Rezolusaun Governu nian, ne’ebé aprezenta hosi Vise-Primeira-Ministra no Ministra Solidaridade Sosiál no Inkluzaun, Armanda Berta dos Santos, ne’ebé nomeia Atanásio de Jesus ba kargu Sekretáriu Ezekutivu husi Komisaun Nasionál Kombate HIV/SIDA Timor-Leste nian no halo revogasaun ba Rezolusaun Governu nian n.2/2014, loron 22 fulan-janeiru”, dehan, Komunikadu Imprensa ne’ebé públika pájina ofisiál Governu nian, Kuarta, (09/09).
Liu-hosi reuniuan ne’e mós KM aprova projetu rezolusaun kona-ba ezenorazaun ba eis Prezidente Konsellu Administrasaun hosi Institutu Jestaun Ekipamentu Timor-Leste, José Luis de Carvalho, relasaun ho aktu lori kareta Estadu hodi tuir festa iha Kupang-NTT tinan kotuk.
Ezenorasaun ne’e, parte Governu liu-hosi aprezentasaun Ministru Obras Públikas, Salvador Soares Pires, nomeia fali funsionariu foun ho naran, Emenegilda da Costa Laurentina, asumi kargu Prezidente Konsellu Administrasaun Institutu Jestaun Ekipamentu nian.
“Konsellu Ministrus aprova ona projetu Rezolusaun Governu nian, ne’ebé aprezenta husi Ministru Obras Públikas, Salvador Soares dos Reis Pires, kona-ba ezonerasaun José Luis de Carvalho no kona-ba nomeasaun Ermenegilda da Costa Laurentina ba kargu Prezidente Konsellu Administrasaun husi Institutu Jestaun Ekipamentu Timor-Leste nian”, hatete, komunikadu ne’e.
Seluk hosi desizaun kona-ba ezenorasaun, KM mós aprova projetu rezoluzaun foun lubuk ida ne’ebé mai hosi Ministru Prezidénsia Konsellu Ministrus, Fidelis Manuel Leite Magalhães, Programa Reforma Administrasaun Públika ba períodu tinan 2019 to’o tinan 2023 no estabelese mekanizmu akompañamentu nian sira ba programa ne’e.
Inklui mós aprova projetu Dekretu-Lei, ne’ebé aprezenta husi Ministru Administrasaun Estatál, Miguel Pereira de Carvalho, kona-ba alterasaun dahuluk ba Dekretu-Lei n.11/2019, loron 14 fulan-juñu, kona-ba Orgánika Ministériu Administrasaun Estatál nian. Iha ne’ebé projetu Dekretu-Lei ne’e atu kria Diresaun-Jerál ida hodi tau-matan ba asuntu Dezenvolvimentu Rurál nian.
KM mós aprova projetu Dekretu-Lei, kona-ba alterasaun dahuluk ba Dekretu-Lei n.7/2019, loron 15 fulan-abríl, ne’ebé aprova Estrutura Orgánika Ministériu Defeza nian. Projetu Dekretu-Lei ne’e atu halakon Gabinete Kooperasaun Tékniku-Militár no Gabinete Arkivu Jerál Defeza nian, no kriasaun Diresaun Nasionál Planeamentu no Diresaun Nasionál Informasaun, Teknolojia no Komunikasaun nian. (Editór, Francisca Soares).
