23
Fri, Oct
3 New Articles

Menus Aula, Estudante Sira Tuir Ezame Iha Varanda Eskola

Situasaun estudante sira wainhira tuir ezame periodu segundu iha varanda eskola Sekundária Públiku Fernando Lasama de Araújo Ainaro. Foto, Basty Noronha.

Flash News

Ainaro-SMI: Relasiona ho fasilidade eskola hanesan aula ba apriendizajen ne’ebé menus fó impaktu ba estudante sira atu tuir ezame iha fatin ne’ebé dignu maibe tenke tuur iha varanda ka ai-hun mahon hodi hala’o atividade ezame refere.

Faktu ne’e akontese iha eskola Sekundária Públiku Fernando Lasama de Araújo iha Ainaro ne’ebé estudante sira hala’o ezame segundu periodu iha varanda eskola no ai-hun mahon sira.

Diretóra Eskola Sekundária Públiku Fernando Lasama de Araújo Ainaro, Ana Maria Pereira, esplika, estudante sira tenke hala’o atividade ezame iha varanda no aihun mahon sira tanba menus fasilidade eskola nian.

“Ami kadeira menus la-sufisiente. Kadeira ne’ebé (agora) atu fasilita ezame ne’e ami hetan balun hosi Administrador munisípiu, kadeira hamutuk 50 hodi fahe labarik sira hodi uza ba ezame”, dehan, Diretóra Eskola, Ana Maria, ba SMI ninia serbisu fatin, Kinta, (10/09).

Liga ho asuntu refere, Diretóra, Ana Maria Pereira, husu ba VIII Governu Konstitusional liu-liu Ministériu Edukasaun, Joventude no Disportu – MEJD atu tau atensaun ba kondisaun eskola iha future oin mai.

Tanba, tuir Diretóra ne’e, aula eskola ne’ebé hamutuk 14 de’it labele fasilita di’ak ba totál estudante  liu rihun ida atu ida lima nolu resin ualu refere.

“Ami iha estudante iha ne’e hamutuk 1,158 pesoas ne’ebé ami divide ba turnu rua ne’ebé turnu ida dader no turnu ida lorokraik. Turnu dader ne’e maizumenus tuir ezame ho di’ak maibe turnu lorokraik ne’e hetan problema, susar atu fahe tanba ami nia aulas hamutuk 14 de’it”, katak, Ana Maria.

Ana Maria Pereira, mós esklarese,  durante ezame parte eskola labele aplika regra hosi parte MEJD tanba problema menus aula no kadeira.

“Atu muda estudante tuir regras sei labele. Difikuldade ne’ebé ma kami hasoru, fatin la-sufisiente, kada aula kuandu eskola normal estudante hamutuk 30 – 35 pesoas, taun ami nia estudante kada turma ida hamutuk 45 to’o 50 pesoas. Taun ami seidauk bele implementa regra hosi Ministériu Edukasaun”, tenik nia.

Antes remata entrevista, nia hatutan, durante ne’e hato’o pedidu ba parte MEJD kona-ba problema fasilidade ne’ebé eskola refere infrenta maibe seidauk iha resposta hosi parte kompetente. (Editór, Caleri Alves).

Pin It

Follow us on Twitter

Sign up via our free email subscription service to receive notifications when new information is available.