23
Fri, Oct
3 New Articles

PNTL Koloka Membru KPK 60 Iha Antigu Postu Administrativu Laivai

Autoridade lokál hosi Suku Eukisi no Ililai hamutuk ho membru KPK ko’a hela keek hafoin seremónia toma pose iha Suku Eukisi, Postu Administrativu Lautém, Munisípu Lautém. Foto, Mídia PNTL.

Flash News

Lautém-SMI: Polísia Nasional Timor-Leste – PNTL munisípiu Lautém fó ona toma-pose ba membru Konsellu Polísiamentu Komunitáriu – KPK hamutuk ema na’in 60 hodi koloka iha Suku rua hanesan Eukisi no Ililai, iha antigu Postu Administrativu Laivai.

Xefe Suku Ililai, Luis Januario de Fátima da Costa, esplika, establesementu KPK iha suku Eukisi no Ililai nu’udar parte ida importante tebes atu bele ajuda Governu hodi kria paz no estabilidade iha báze liu-liu iha postu administrativu Lautém, munisípiu Lautém.

“Objetivu hosi establesementu KPK ne’e importante loos. Atu bele ajuda polísia no Governu hodi asegura estabilidade iha báze. Ida-mak oinsa ho establesementu KPK ne’e bele kontribui ba dezenvolvimentu nasional liu-hosi serbisu hametin seguransa iha báze”, dehan, Luis de Fátima da Costa, ba SMI liu-hosi telefone, Segunda, (14/09).

Luis Januario, hatutan, area postu administrativu antigu Laivai nu’udar odamatan boot ba munisípiu Lautém presiza duni establese KPK atu bele fasilita estadu hodi rezolve problema sosiál ne’ebé sempre akontese iha komunidade nia-leet.

“Komunidade iha problema sosiál barak, relasaun ho konjuntura polítika nomós mosu konflitu entre komunidade no joventude sira hosi suku ida no suku seluk, presiza KPK nia prezensa atu rezolve. Liu-liu hanesan suku Ililai no Eukisi ne’ebé iha odamatan boot munisípiu nian presiza iha KPK atu kontribui ba dezenvolvimentu seguransa iha báze”, katak, Luis.

Maske nune’e, autoridade lokál ne’e husu ba parte komandu PNTL atu fasilita formasaun ba membru KPK hosi suku Ililai no Eukisi hodi bele hala’o serbisu ho di’ak.

Iha parte seluk, Xefe Suku Eukisi, Tomas Ximenes Soares, hatete, sei halo kordenasaun ho parte kompetente atu bele apoiu formasaun ba membru KPK hosi suku Eukisi no Ililai liu-liu iha area kona-ba atuasaun no rezolve konflitu iha báze.

“Ami presiza iha formasaun ba membru KPK sira. Membru KPK presiza hetan kuiñesementu kona-ba atuasaun no oinsa bele rezolve problema iha komunidade waihira mosu konflitu”, tenik, Tomas Ximenes. 

Tomas, klarfika, hosi totál membru KPK hamutuk ema na’in 60 ne’ebé hetan toma pose iha loron 10 fulan Setembru foin lalais ne’e, maizumenus ema na’in 50 mak sei ativu iha estrurura hodi hala’o atividade KPK nian.   

Membru KPK hamutuk ema na’in 50 ne’e kompostu hosi suku rua hanesan suku Ililai hamutuk ema na’in 25 no Eukisi hamutuk ema na’in 25.

“Iha ami (suku Eukisi) ema 25, suku hamutuk ema na’in 50”, dehan, Tomas.

Antes remata entrevista, nian afirma, nu’udar autoridade lokál sei fó apoiu masimu ba programa KPK hodi asegura estabilidade no paz iha komunidade nia-leet.

Seremónia toma pose membru KPK hamutuk ema na’in 60 ne’e hosi Komandante PNTL munisípiu Lautém, Superintendente, António Rego, ne’ebé partisipa mós autoridade sira hanesan Administrador munisípiu Lautem, Presidente Konsellu Veteranus no antigus Kombatentes Libertasaun Nasional, administrador postu, Komandante eskuadra, no autoridade lokál iha postu antigu Laivai.   (Editór, Caleri Alves).

Pin It

Follow us on Twitter

Sign up via our free email subscription service to receive notifications when new information is available.