23
Fri, Oct
3 New Articles

Mídia 4 Boikota Kongresu Hili Reprezentante Ba CI, Tempo Timor Halai Lakon

Prezidente CI, Virgílio Guterres konversa hela no hamansa hamutuk ho mídia na’in sira iha kongresu hili reprezentante mídia na’in, tersa, (15/09), iha Salaun Delta Nova. Foto, Mídia CI.

Flash News

Díli-SMI: Na’in ba mídia boot 4 iha Timor-Leste hanesan INDEPENDENTE, Timor Post – TP, Suara Timor Lorosa’e – STL no Grupu Mídia Nasionál – GMN deside la-partisipa kongresu hili reprezentante mídia na’in ba Conselho de Imprensa – CI no na’in ba Tempo Timor mak tuir maibe halai sai no la fila to’o kongresu remata.

Na’in ba mídia Tempo Timor – TT, José Antonio Belo, fó razaun sai hosi salaun kongresu hodi la-tuir eleisaun ba sira nia reprezentante ba CI tanba solidariza ba mídia boot 4 ne’ebé halo boikota ba kongresu refere

“Ami solidariza ba mídia mais boot no solidariza ho Conselho de Imprensa. Ejize Conselho de Imprensa rezolve uluk problema entre Conselho de Impresa ho mídia na’in 4 hanesan STL, GMN Grupo, Timor Post no Independente para sira mós hola parte”, dehan, Diretúr Tempo Timor, José Belo, ba jornalista sira hafoin sai hosi salaun kongresu Delta Nova, Tersa, (15/09).

Tan-ne’e, José Belo, hatutan, ninia parte konfuzaun no duvida ho kapasidade Conselho de Imprensa hodi organiza kongresu hili reprezentante mídia na’in ba CI maske parte mídia boot sira balun la partisipa.

“Se ita hili reprezentante hili tiha reprezentante ida, reprezentante ida ne’e ba de’it sira agora hili ne’e ka ba mídia hotu-hotu?”, kestiona hosi José Belo.

Nune’e, José Belo, konsidera líder Conselho de Imprensa laiha vontade no kapasidade atu rezolve problema ho mídia boot sira antes realiza kongresu ne’e.

Maibe, iha parte seluk, Prezidente CI, Virgílio Guterres, esplika, CI serbisu ho baze legál hodi konvida mídia hamutuk 28 ne’ebé inklui mós mídia boot 4 refere atu tuir kongresu hili reprezentante mídia na’in nian.

“Conselho de Imprensa nia serbisu mak tuir lei. Orgaun komunikasaun sosiál no meiu komunikasaun sosiál ne’ebé ami rejista hamutuk 28, ne’e orgaun komunikasaun sosiál, la sura ho meius komunikasaun sosiál hamutuk 28, naran sira ne’e ami publika ona iha jornál da repúblika, ami konvida sira, ami fó sai konvite atu mai partisipa (kongresu)”, dehan, Virgílio Guteres.

Maske nune’e, Virgílio, rekuiñese katak na’in ba mídia boot sira iha ANM la-marka prezensa iha kongresu tanba Conselho de Imprensa la-simu asuntu balun ne’ebé sira propoin hanesan mídia diretu vota no kandidatu-an iha kongresu tenke mídia ne’ebé eziste tinan 5 ona.

“Lei komunikasaun sosiál laiha definisaun kona-ba durasaun tinan 5 ka mais-menus. Maibe iha kritéria mak órgaun komunikasaun sosiál ne’ebé iha estatutu editorial, konsellu redasaun, iha sede no responsavél. Entaun ami labele simu proposta hosi ANM”, katak, Virgílio.

Ho nune’e, nia fó razaun katak, CI labele hakruk ba ejizensia ANM atu viola fila fali lei hodi limita mídia na’in seluk atu tuir kongresu foin lalais ne’e.

Antes ne’e, Sekretáriu Jerál ANM nomós na’in ba mídia INDEPENDENTE, José Sarito Amaral, liu-hosi mídia online www.Independente.tl iha Kuarta, (16/09) klarifika ona ba publiku kona-ba pozisaun hodi la-tuir kongresu hili reprezentante mídia na’in tanba Conselho de Imprensa la konsidera sira nia ejizensia.

Tuir observasaun SMI hatudu katak na’in ba mídia Tempo Timor sai hosi salaun Delta Nova no la-tuir eleisaun to’o remata hafoin hato’o pergunta ka komentáriu lubuk ida iha kongresu. (Editór, Francisca Soares).  

Pin It

Follow us on Twitter

Sign up via our free email subscription service to receive notifications when new information is available.