Díli-SMI: Membru instituisaun FALINTIL-Forsa Defeza Timor-Leste – F-FDTL hamutuk ema na’in 46 hetan graduasaun sai nu’udar Polísia Milítar – PM foun hafoin tuir treinamentu maubere V durante fulan 3 nia laran.
Xefe Estadu maior jenerál F-FDTL, Maijor jenerál, Lere Anan Timur, apela ba membru PM foun atu hala’o knar ho didiak hodi kontribui ba naran di’ak instituisaun milítar dezenvolvimentu instituisaun defeza no seguransa iha rai-laran.
“Sai milítar tenke kumpri regra sira, ordem. Sai Polísia milítar la’os fasili, maibe defisil tanba hetan dezafiu oi-oin atu sai milítar”, dehan, Lere Anan Timur, liu-hosi ninia diskursu iha seremónia graduasaun membru PM foun, Kinta, (17/09).
Lere, haforsa tan, membru milítar tenke obdese ba ordem komandu no sai ezemplar ba sosiadade wainhira simu responsabilidade hodi sai nu’udar lutu ba nasaun.
Tan-ne’e, wainhira sai ona milítar tenke hatudu komportamentu ne’ebé di’ak durante hala’o misaun iha komunidade nia-leet.
“Sai milítar (tenke) kumpri regras, ordem, disiplina no halo tuir saida mak komandu sira haruka, tanba milítar mak liña frente tenke hatudu ezemplu ne’ebé di’ak no toma responsabilidade”, dehan, jenerál fitun rua ne’e.
Iha parte seluk, Komandante PM, Maijor Infantaria, Abel da Costa Xavier ‘Niky’, fó ninia kongratulasaun ba pesoal sira ne’ebé simu graduasaun hodi sai membru PN foun.
Abel, reforsa, unidade PM importante tebes iha instituisaun milítar nian hodi asegura no garante lei no ordem iha internal F-FDTL nian.
"Polísia Milítar importante iha instituisaun F-FDTL nian ho objetivu atu asegura instituisaun F-FDTL . Garantia ordem disiplina interna iha F-FDTL no garantia servisu tuir estatutu F-FDTL nian”, tenik, komandante PM ho kódigu fun “Niky” ne’e.
Nia mós fó hanoin ba graduadu sira ne’ebé simu ona graduasaun hodi sai membru PM tenke kumpri regra no tau-as disiplina iha instituisaun milítar nian.
Seremónia gradusaun ne’e hetan partisipa hosi embaixadór Brazil, Australia, Nova Zelandia, membru PM no familia graduadu sira. (Editór, Caleri Alves).
