Díli-SMI: Membru Polísia Nasional Timor-Leste – PNTL hosi Unidade Ema Vuneravel – (VPU sigla Ingles) hamutuk ema na’in 30 remata ona kursu kona-ba kombate krime violasaun no abuzu seksual ba labarik minoridade.
Komandante Jerál PNTL, Komisariu, Faustino da Costa, agradese ba membru polísia investigador VPU ne’ebé finaliza ona sira nia kursu ho rezultadu di’ak hodi bele sai bukae iha prosesu atendementu kazu kona-ba violasaun no abuzu seksual ba labarik sira iha futuru.
“Parabéns ba investigador VPU sira ne’ebé mak partisipa kursu ne’e ho susesu hodi nune’e liu-hosi lisaun ne’ebé mak imi aprende bele sai referensia ba ita-boot sira nia asaun iha terrenu”, dehan, Komisáriu, Faustino da Costa, iha Sentru Formasaun Polísia, Komoro, Sexta, (18/09) semana kotuk.
Faustino da Costa, apela ba ninia membru ne’ebé remata ona formasaun ne’e atu kontinua hala’o sensibilizasaun kona-ba asuntu violasaun bázea ba jéneru hodi nune’e bele reduz krime violasaun no abuzu seksual iha komunidade nia-leet.
“Husu ba imi atu kontinua halo sensibilizasaun violénsia bazeia ba jeneru no kontinua servisu makaas atu nune’e bele redus krime ne’e”, dehan, líder instituisaun seguransa ne’e.
Iha biban hanesan, Komandante Servisu Investigasaun Kriminal Nasionál – SIKN, Superintendente Xefe, Jose Neto Mok, konsidera formasaun ba investigador VPU nia ne’e importante tebes hodi bele garante kualidade investigasaun polísia relasaun ho kazu krime violasaun no abuzu seksual nian.
“Kursu ne’e importante tebes ba investigador sira hodi hasa’e sira nia kuiñesementu no kapasidade membru sira nian kona-ba oinsa halo prosesu investigasaun ne’ebé klean no seguru ba vítima sira”, katak, Neto Mok.
Tanba, tuir Komandante SINK, katak, ho formasaun ne’e bele ajuda prosesu investigasaun lalais hodi enkamina ba parte kompetente atu foti desizaun ho justu ba vítima hosi krime violasaun no abuzu seksual nian.
Formasaun kombate krime violasaun no abuzu sexual ne’e durante loron rua no foka liu ba oinsa dezenvolve abilidade kona-ba atendmentu ba vítima, lejizlasaun, foti deklarasaun, jestaun ba lokál krime, mekanizmu inkeritu, entrevista suspeitu, preparasaun arkivu kazu no seluk tan.
Tuir planu formasaun refere ba faze daruak sei realiza iha fulan Novembru, no kontinua iha tinan oin. (Editór, Caleri Alves).
