Díli-SMI: Governu atúal ne’ebé lídera hosi Primeiru Ministru, Taur Matan Ruak, aprova ona dekretu lei kona-ba establesementu medidia apoiu ba komunidade sira iha teritóriu laran ho valór durante fulan Novembru to’o Dezembru 2020 liu-hosi atribuisaun sesta-bázika ho valór orsan $.25.00.
“Sesta-bázika ne’e sei atribui iha fulan-novembru no fulan-dezembru, ne’ebé nia montante fiksa tiha ona to’o $25,00 (dolar amerikanu ruanulu-resin-lima), ba membru ida-idak husi agregadu família nian, kada fulan iha fulan rua ne’e nia laran. Sesta bázika ida bele troka ho folin sasán ne’ebé korresponde ba valór osan nian”, dehan, komunikadu imprensa, ne’ebé públika iha pájina Governu, Kuarta, (23/09).
Planu apoiu Governu ne’e la’os de’it ba família maibe mós ba produtór agríkola no operadór komersiál ba produtu alimentár no ijiene pesoál, nasionál no lokál nian sira.
Ho intensaun atu bele aslera ka dudu ekonómia ba tempu badak nian laran iha ámbitu planu rekoperasaun.
“Objetivu (atribuisaun sesta-bázika) atu estimula ekonómia iha kurtu-prazu no fó insentivu ba produsaun no ba komérsiu, iha ámbitu Planu Rekuperasaun”, dehan, komunikadu ofisiál ne’e.
Apoiu ne’e mós atu estimula dinámika ekonómika lokál liu-hosi sirkulasaun rekursu finanseirus ne’ebé presiza tebetebes atu hasa’e produsaun nasionál, nune’e, bele hamenus impaktu sira husi krize ekonómika tanba pandemia.
Dezisaun Governu hodi distribui sesta-bázika ka orsan $25.00 ne’e atu bele ajuda komunidade ka família vuneravel no atu kontribui ba polítika kontra hamlha iha rai-laran.
“Medida ne’e bele tulun família sira atu sustenta sira-nia nesesidade bázika, nune’e, bele kontribui atu kombate hasoru hamlaha no vulnerabilidade boot ne’ebé eziste iha rejiaun balu iha territóriu nia laran ne’ebé ki’ak no izoladu liu”, tenik, komunikadu ne’e.
Tuir komunikadu, ema ne’ebé sai benefisiáriu ka bele hetan sesta-bázika ne’e mak família agregadu ne’ebé rejista ona iha dokumentu rejistu “Uma-Kain” nian.
Inklui komunidade ka timoroan sira ne’ebé tama hela iha instituisaun sosio-edukativa, relijioza, sanitária sira ka ema sira-ne’ebé tama hela iha komarka, maibé sira-ne’e sei simu ketak no la inklui iha sira-nia uma-kain.
Governu ninia desizaun ba apoiu atribuisaun sesta-bázika ne’e bazeia ba projetu dekretu lei ne’ebé aprezenta liu-hosi Ministru Koordenadór Asuntus Ekonómikus, Joaquim Amaral, no aprova iha reuniaun Konsellu Ministru nian. (Editór, Francisca Soares).
