Díli-SMI: Governu Timor-Leste liu-hosi Ministériu ba Asuntu Parlamentar no Komunikasaun Sosiál – MAPKOMS halo hela esforsu hodi garante diretu informasaun ba povu iha teritóriu laran tomak kona-ba polítika Governu nian ho programa Disminasaun Informasaun Nasional – DIN.
“Nu’udar ministériu ne’ebé tutela iha area komunikasaun sosiál, ami nia papél importante ida mak oinsá atu halo koordenasaun ho liña ministerial sira iha programa diseminasaun informasaun kona-ba asaun Governativa nian, tanba tuir polítika VIII Governu Konstitusionál nian, hakarak ita nia populasaun sira iha kraik ne’ebá tenke hatene saida mak sira Governu halo”, dehan, Ministru, Francisco Jerónimo, iha Palásiu Governu, Segunda, (19/10).
Ministru, Francisco Jerónimo, afirma, teknikamente parte MAPKOMS sei halo preparasaun no kordenasaun iha nivél nasional, munisípiu no suku sira antes implementa programa DIN refere.
Tanba konsidera programa DIN importante tebes hodi promove asaun konkretu polítika Governu nian ba públiku liu-liu povu iha area rural.
“Programa DIN ne’e, ninia objetivu prinsipál mak promove asaun Diseminasaun Informasaun iha nivel nasionál ho forma integradu, programadu, sistemátiku no orientadu. Programa ne’e tuir planu sei implementa iha fulan Novembru no Dezembru 2020 iha munisípiu Covalima, Bobonaro no RAEOA”, dehan, Jerónimo.
Maske nune’e, antes implementa programa DIN refere sei establese ekipa serbisu ida hodi elabora planu asaun no orsamentu hodi bele garante ba implementasaun programa refere.
“Téknikamente oinsá mak atu prepara ekipa taks force ida hodi elabora ninia planu asaun no orsamentu kona-ba forma ida di’ak liu hodi implementa Programa DIN ne’e”, katak nia. (Editór, Caleri Alves)
