Díli-SMI: Instituisaun Polísia Nasionál Timor-Leste – PNTL durante trimestre daruak (Jullu – Setembru) rejista kazu hamutuk 445 kompostu hosi kazu ofensas integrida fizika hamutuk 155, kazu violénsia domestika hamutuk 47 no kazu sira seluk hamutuk 243 ne’ebé komete hosi sidadaun sira.
“Iha fulan tolu (3) nia laran Komandu PNTL munisípiu Díli rejista kazu krime hamutuk 445 hosi kazu hirak ne’ebé maka iha maioria ofensas integridade fizika hamutuk 155, violénsia domestika 47 no kazu seluk-tan”, dehan, Komandante PNTL Munisípiu Dílii, Supertintendente Xefe, Henrique da Costa, durante enkontru Konsellu Seguransa Munisípal – KSM, iha Sentru Formasaun Polísia, Comoro-Díli, foin lalais ne’e.
Superintendente Xefe, Henrique da Costa, relata mós kazu infrasaun seluk hanesan sidadaun sira la uza kapasete wainhira konduz motorizada hamutuk 1.587. No, hosi totál kazu infrasaun sira ne’e, parte PNTL hatama reseita ba Estadu hamutuk $45,459.00 mai hosi infrator sira selu multa.
“Komandu PNTL munisípiu Díli mós rejista kazu infrasaun hamutuk 1.587 maioria motorista sae motor la uza kapasete no seluk-tan. Infrator sira selu multa ka koima durante fulan tolu (3) hahú Jullu-Setembru hamutuk $54.459”, dehan, Henrique.
Liga ho kazu infrasaun nian, Henrique, esplika, instituisaun polísia liu-hosi asaun Vizibilidade, Independente no Profisíonalizmu – VIP nian hodi koloka membru PNTL iha estrada sira atu nune’e bele reduz kazu infrasaun sira iha futuru.
Hosi implementasaun VIP ne’e mak involbe mós parte membru Konsellu Polisiamentu Komunitáriu – KPK, líder komunitariu no parseiru sira seluk nu’udar pontu pozitivu atu prevene ka kombate krime iha rai-laran.
Durante ne’e, parte Unidade Polísia Komunitariu, Investigasaun no Tranzitu hala’o ona dezeminasaun kona-ba oinsa bele prevene krime no infrasaun iha futuru oin mai.
“Ita mós nafatin eduka ita nia povu liu-hosi programa polísia vizita ba Kampus, atividade ida ne’e remata iha fulan kotuk ne’ebé mak identifika universidade hamutuk 11 ne’ebé Departamentu Polisia Komunitaria, Investigasaun no Tranzitu sira maka halo sosializasaun konaba Servisu Polisiamentu Komunitaria, Regras Tranzitu no Prevensaun Krime”, dehan nia.
No, tuir planu iha fulan Novembru parte PNTL sei kontinua sensebiliza kona-ba asuntu prevensaun krime no infrasaun ba estudante sira rai-laran. (Editór, Guido Santos).