Díli-SMI: Sekretáriu Estadu Joventude no Disportu – SEJD, Abrão Saldanha, hateten, ninia parte hakarak halo esforsu hodi realiza mehi atu promove Governu dijitalizadu durante ninia mandatu hodi nune’e bele proteze arkivu administrasaun Estadu nian.
“Ha'u nia mehi ida mak governasaun dijitalizadu bele hahu iha SEJD durante ha'u nia mandatu ida ne'e. Ohin loron ema barak mak uza ona teknolojia foun iha servisu fatin. Dadus barak mak persiza arkiva no dadus sira ne’e tenki tuir sistema dijitalizasaun”, dehan SEJD, Abrão Nokosiku Saldanha, wainhira hala’o abertura ba formasaun dijitalizasaun arkivu, iha Licidere, Kinta, (22/10).
Tuir Abrão Saldanha, sistema dijitalizasaun ne’e importante tebes tanba bele asegura arkivu instituisaun Estadu liu-liu SEJD nian iha futuru.
“Dijitalizasaun no protesaun ba arkivu ne’e importante tebes atu preserva SEJD nia memória Institusional, no tamba ne'e funsionáriu sira tenke partisipa ho di’ak atu bele aplika kedas iha sira nia serbisu fatin”, katak, Nokosiku.
Iha parte seluk, Diretora Nasional Diresaun Informasaun, Komunikasaun no Teknolojia – DNICT, Aida de Jesus Soares, esklarese, polítika formasaun kona-ba arkiva dijital ne’e mai hosi planu SEJD nian atu bele prezerva memória instituisaun Estadu iha futuru oin mai.
Tanba durante ne’e parte SEJD rasik sei uza sistema manual hodi prezerva dokumentu ofisiál SEJD nian ne’ebé defisil tebes atu prezerva arkivu sira.
"Durante ne’e, SEJD iha arkivu rasik maibé uza sistema manual deit. Tamba ne'e ha'u agradese Sua Excellencia Sekretariu Estadu ba polítika ne'ebé ita bele hahu tau iha prátika ohin liu-hosi formasaun ida ne'e tamba importante tebes duni atu asegura SEJD iha sistema ne'ebé di’ak ba prezerva memória institusional," Dehan, Aida Soares.
Tuir planu sei dijitaliza arkivu manual sira ne’ebé relasaun ho serbisu hahú SEJD Abrão Saldanha hala’o ninia knár nu’udar Governante iha instituisaun refere.
Formasaun dijitalizasaun arkiva ne’e partisipa hosi funsionáriu hamutuk ema na’in 25 ne’ebé mai hosi dirasaun no unidade sira iha SEJD nian. Formasaun refere atu bele eleva kapasidade funsionariu SEJD kona-ba arkivu liu-liu relasaun ho serbisu dijitalizasaun administrasaun nian. (Editór, Caleri Alves).
