Ermera-SMI: Komunidade suku Ura-hou, Postu Administrativu Hatolia, Munisípiu Ermera sente triste ho Governu ninia promesa sira hodi hadi’a estrada no dada eletrisidade ba povu maibe realidade tinan 20 resin ona nunka akontese.
"Triste tebes ho realidade ne’ebé ami infrenta tamba la asesu estarda hanesan ho suku sira seluk, Governo promete ona atu dada ahi no hadi’a estrada, maibe to'o agora sira nia promesa la konsege realiza”, dehan, Negosiante, Isabel Soares, ba jornalista SMI, iha Ermera, Tersa, (27/10).
Isabel Soares, konsidera estrada importante tebes ba komunidade suku Ura-Hou tanba atu fasilita transportasaun produtu lokál ba merkadu hodi faan, nune’e bele finansia oan sira nia estudu no nesesidade uma laran nian.
“Ami presiza estrada di’ak atu bele ba faan sasan hodi hetan oituan orsan, nune’e bele selu oan sira ba eskola no haree moris lor-loron”, katak, Isabel, ho oin triste.
Negosiante ho idade 60 resin ne’e esplika, wainhira tempu udan kuaze komunidade labele asesu transporte públiku hodi faan produtu lokál maibe tutur la’o ain de’it hosi suku Hura-Hou ba postu Hatulia ho distansia maizumenus kilometru 12.
Wainhira tempu udan transporte públikub tauk lakohi halo movimentu ba suku Hura-Hou tanba bele mosu asidente relasiona ho kondisaun estrada ne’ebé at tebes.
“(Komunidade) la’o ho ain hodi tutur de'it produtu lokál mak modo, fehuk, aifarina no seluk tan, lori la’o ba merkadu kuaze kilometru 12. kuandu tempu udan nee, transporte públiku sira la halai tanba estrada at demais, se obriga kareta halai mak sei akontese asidente”, dehan, inan negosiante ne’e.
Maske estrada sa dezafiu boot, maibe komunidade sira sempre aluga kareta ho orsan montante Dollar Atus Ida Neen Nolu ($160) hosi suku Hura-Hou mai kapitál Díli hanesan merkadu Taibesi no seluk tan.
Preokupasaun komunidade ne’e reforsa hosi Xefe Suku Hura-Hou, Alberto Soares, katak, durante ukun-an to’o ohin loron estrada sai preokupasaun povu iha area refere.
“Durante nee ,ami seidauk asesu estrada to’o agora. Populasaun iha suku ne’e, produtu lokál barak tebes,maibe susar atu asesu merkadu tanba estrada at no susar mós atu asesu transporte Públiku, produtu sira ne’e estraga de’it”, afirma, lider komunitariu ne’e.
Ho nune’e, husu ba Governu atu tau konsiderasaun ba preokupasaun povu suku Hura-Hou hodi hadi’a estrada no instala eletrisidade hodi nune’e bele fasilita nesesidade komunidade nian. (Editór, Caleri Alves).
