Laútem-SMI: Tinan ida ne’e, Governu Timor-Leste hamutuk hamutuk ho sosiadade sivil komemora loron nasionál feto ba dala 45 ho lutu-metan tanba antes ne’e feto maluk timoroan ho naran Domingas hetan oho hosi mane ida wainhira atu salva ninia oan feto hosi aktu violasaun seksual.
Kazu asasinatu ne’ebé akontese iha loron 30 Outubru 2020 maizumenus tuku 1 madrugada ne’e hetan reasaun maka’as hosi entidade tomak iha rai-laran, inklui líder nasionál hanesan Kay Rala Xanana Gusmão rasik.
Maske nune’e, Governu kontinua hala’o komemorasaun loron nasional feto ba dala 45 ho tema “Promove Partisipasaun Feto iha Nivel Foti-Desizaun hodi Lidera ba Mudansa Inkluziva” iha Postu Administrativu Luro, Munisípiu Laútem.
Liu-hosi selebrasaun ne’e, Sekretária Estadu ba Igualdade no Inkluzaun – SEII, Maria José da Fonseca Monteiro de Jesus, afirma, Governu iha komitmentu hodi kontinua promove feto sira ba nivél lideransa no foti dezisaun.
“Ita hotu presiza kontinua promove maluk feto sira ba iha nivel lideransa nian no bainhira maluk feto sira ba tuur iha kargu foti-desizaun sira bele asegura mudansa iha ita-nia sosiedade ne’ebé inkluzivu atu ema hotu bele partisipa ativa no hetan benefísiu hanesan hosi programa governu nian ne’ebé oferese ba timór-oan”, Maria José da Fonseca, iha Postu Administrativu Luro, Tersa, (03/11) wainhira partisipa komemorasaun loron nasional feto iha area refere.
Maria Fonseca, konsidera desde TL hetan ninia independensia to’o ohin loron feto no labarik kontinua hetan diskriminasaun no sai vítima ba violénsia iha sosiadade nia leet.
Ho nune’e, Governu sei esforsu hodi asegura diretu feto no labarik hodi hetan tratamentu ne’ebé di’ak no justu iha sosiadade timorense nian.
“Ita hatene katak, iha timór-laran tomak feto no labarik feto sei nafatin sai vítima no diskriminasaun oioin, ita lakohi tan ona ema ida sai vítima ba violénsia iha ita-nia sosiedade no ida-ne’e sai responsabilidade ita hotu nian.
”tu asegura laiha ema ida hosi ita maka fó oportunidade ba ema ruma atu halo violénsia hasoru ema seluk no timór-oan hotu iha direitu hanesan atu hetan tratamentu hanesan, labele tan ona ema ida la sente seguru iha nian uma-rasik”, dehan, Maria.
Governu lokál hanesan Administradór Munisípiu Lautem, Zeferino dos Santos Sequeira, mós fó korajen ba feto sira atu bele sai nu’udar autor ba dezenvolvimentu liu-hosi lideransa no foti desizaun ne’ebé garante ona iha lei-inan.
“Ita-nia konstituisaun hateten, partisipasaun maluk feto sira iha nivél foti-desizaun tuir ona nia kuota liu-liu iha parlamentu nasionál, ne’e katak, estadu respeita tebes maluk feto sira atu foti desizaun no kontribui ba dezenvolvimentu nasionál”, tenik nia.
Komemorasaun loron nasional feto iha Postu Administrativu Luro ne’e hetan pastisipa hosi membru parlamentu nasional, membru Governu no autoridade munisípiu Laútem nian. (Editór, Francisca Soares).
