Díli-SMI: Prezidente Asosiasaun Jornalista Timor Lorosa’e – AJTL, Zevonia Veira, hateten, matéria kona-ba Digital Security ne’e importante tebes ba jornalista online sira iha tempu agora hodi nune’e bele hatene informasaun ne’ebé loloos no falsu.
“Jornalista mídia online sira presiza hatene Digital Security ne'e, tanba iha era digital ida ne’e sai obstakulu boot ba (jornalista) atu detekta infomasaun sala, desinformasaun ka notísia falsu no Liafuan Odiu sira”, dehan, Zevonia, iha salaun Conselho de Imprensa wainhira fó materia iha sesaun formasaun ba jornalista online sira, Kuarta, (25/11).
Ho nune’e, Zevonia, argumenta katak jornalista mídia online sira iha rai-laran presiza iha kuiñesementu di’ak kona-ba digital security hodi bele separa informasaun falsu ho informasaun ne’ebé loloos.
“Digital Security ne'e di’ak tebes ba Jornalista mídia Online tamba iha era digital ne'e mídia online sai plataforma importante ba jornalista online sira”, katak nia.
Objetivu hosi digital literacy ne'e oinsa atu asegura dadus importante atu ema seluk labele foti ema ida ninia informasaun ka dadus atu estraga privasidade iha públiku.
Iha Parte seluk , partisipante formasaun jornalizmu kompriénsivau, Mercio Morato Pinto, nu’udar jornalista hosi mídia online Neonmetin dehan, formasaun ho matéria refere importante ba ninia atividade iha future.
“Ha’u kontente tanba bele aprende no tulun ha’u nia futuru atu identifika no verifika informasaun ka notísia loos no sala”, tenik nia.
Antes ne’e, partisipante jornalista hamutuk 22 ne’ebé mai hosi mídia online sira iha rai-laran hahú ona formasaun semana ida iha Postu Administrativu Bobonaro no sei konklui iha semana ida ne’e nia laran iha Dili. (Editór, Guido Santos).
