Díli-SMI: Governu identifika ona fatin 3 iha kapitál Díli hanesan Bekora, Hera no Comoro ne’ebé tama iha planu urbanizasaun no habitasaun ba komunidade hodi harii uma hamutuk 2000 ne’ebé parte Konsellu Administrasaun Fundu Infra-estrutura – KAFI aprova ona iha 2019.
“Iha 2019 estudu ita halo, tenderizasaun hala’o hela, iha mós habitasaun komunidade 2000 unidades ne’ebé foin daudauk KAFI aprova tiha ona. Iha fatin tolu ne’ebé durante tinan 2 nia-laran ne’e ami servisu maka’as loos ho Ministériu Justisa hodi identifika rai fatin 3, mak iha Comoro, Hera no Bekora”, dehan, Ministru Obras Públikas – MOP, Salvador Soares dos Reis, iha Otel Novo Turizmu, Tersa, (14/12).
Ministru, Salvador Pires, klarifika, entre fatin 3 ne’ebé identifikadu ona ne’e parte Bekora ne’ebé atu instala uma hamutuk 4000 maibe Governu uza fali balun ba instalasaun sentru desportu ba joventude sira, nune’e futuru bele harii uma hamutuk 2000 de’it.
“Iha Bekora ita muda ona. Uluk ita iha rai inísiu ne’e ba harii uma 4000 unidades nian maibé tanba rai ne’ebé ami hetan la to’o tuir ita-nia hakarak, ida fali Governu foti fali (iha Bekora) tanba atu halo Sentru Desportu ba Juventude sira iha Bekora entaun ita deminui tuir metru kuadradu hektares, luan rai nian bele halo de’it 2000 unidades”, katak, Salvador.
Governante ne’e, hatutan, maske parte KAFI aprova ona planu urbanizasaun no habitasaun komunidade maibe parte Governu presiza kompleta ho estudu viabilidade no estimasaun finanseiru antes implementa projeitu refere.
Planu implementasaun projetu ne’e hosi Ministériu Planu no Ordenamentu – MPO, Ministériu Finansa – MF no MOP rasik.
“Ne’e la’os ita serbisu mesak de’it, ita serbisu ho Ministériu Finansas, nomós MPO no Obras Públikas hamutuk hodi prepara akordu preparasaun projetu ne’e rasik.
Hodi implementa polítika urbanizasaun no habitasaun komunidade refere, VIII Governu rasik prepara ona esbosu lei tolu hanesan Kódigu Edifisiu Konstrusaun Sivíl, Klasifikasaun Uzo de Solo no Instrumentu Planeamentu Teritoriál ne’ebé mai hosi baze lei nú 6/2017 nian.
“Ami prepara esbosu lei tolu, edifikasaun urbanizmu ne’ebé ita bele deriva hanesan Kódigu Edifísiu Konstrusaun Sivíl, Klasifikasaun Uzo de Solo, ida fali mak Instrumentu Planeamentu Teritoriál, nia lei baze mak iha númeru 6/2017 de 19 de Abril”, tenik nia.
Tuir, Pires, projetu ne’e rasik Governu hala’o koperasaun ho International Finance Corporation – IFC ne’ebé tuir planu sei asina iha tempu badak nia laran. (Editór, Guido Santos).
