Díli-SMI: United Nations Development Program – UNDP hamutuk ho Facebook fasilita formasaun ba jornalista hamutuk 45 hosi kanál mídia oi-oin kona-ba oinsa uza Facebook ho seguru no responsabilidade hodi nune'e bele evita publikasaun informasaun falsu sira.
Xefe Unidade Governasaun Demokrátika UNDP Timor-Leste, Youngchan Kim, esplika, mídia no jornalizmu ne'ebé profísional, independente no diversu sai hanesan sasukat ida ba Governasaun di’ak iha era globalizasaun liu-hosi uza internete ka mídia sosiál hanesan facebook ho saúdavel.
Nune’e, parte UNDP serbisu hamutuk ho Facebook hodi fasilita formasaun ba jornalista sira hodi nune’e bele hetan kuiñesementu kona-ba oinsa uza mídia sosiál ho seguru.
“Objetivu hosi formasaun ida-ne’e atu fó apoiu ba jornalista sira liu-liu atu hatene kona-ba nova mídia tamba oras ne’e dadaun iha amesa ida ba Facebook ka nova mídia”, dehan, Youngchan Kim, iha Otél Timor, Tersa, (15/12).
Iha biban hanesan, Prezidente Conselho de Imprensa – CI, Virgílio da Silva Guterres, hatete, formasaun kona-ba utilizasaun mídia sosiál facebook ho seguru ne’e importante tebes ba jornalista atu nune’e bele evita uza informasaun falsu sira hosi Facebook.
“Formasaun ida ohin kona-ba utilizasaun mídia sosiál nian ne’e importante tebes. Conselho de Imprensa sente katak ne'e buat ne'ebé durante ita ko’alia kona-ba facebook no ohin la’os ita mak diskusi ho facebook, maibe Ita ko’alia duni ho Facebook”, tenik Virgílio.
Parte seluk, péritu sira hosi Facebook esplika matéria sira hanesan konta Facebook nia seguransa no privasidade bázika nian.
Nune’e mós kona-ba denunsiasaun konta falsifikadu, prevene asédiu online, desinformasaun no hate speech, inklui kona-ba feramenta sira seluk ne’ebé iha Facebook.
Formasaun ne'e ho intensaun atu hasa’e kuiñesementu jornalista sira uza mídia sosiál Facebook ho seguru liu-hosi meiu virtual ne’ebé uza aplikasaun Zoom. (Editór, Francisca Soares).