Manufahi-SMI: Kareta tanki ne’ebé tula gazólina hosi Díli atu ba munisípiu Manufahi hetan dezastre ka baku-fila iha area Erlesu, Suku Holarua, Postu Administrativu Same hodi rezulta ema ida kanek todan no ema na’in rua kanek kamán.
“Mane ida hetan kanek todan no mane na'in rua kanek kamán no evakua ba óspitál Same tanba kareta tanki tula gazólina ho sapa matríkula (60-089 Tl.) hetan asidenti baku fila iha Erlesu Suku Holarua Postu Administrativu Same”, dehan, Komandante Korpu Bombeiros Munisípiu Manufahi, Bruno da Costa Magalhães, ba SMI iha nia serbisu fatin, Same, Kinta, (21/01).
Komandante Korpu Bombeiros ne’e esplika, hafoin asidente ne’e parte bombeiros to’o kedan iha fatin akontesementu hodi evakua vitíma ba óspital Same hodi hetan tratamentu médiku nian.
Iha akontesementu kareta kombustível baku-fila ne’e rezulta kondutór hetan kanek grave tanba monu iha fatuk le’et no na’in 2 seluk hetan kanek kamán
“Iha asidente ne'e ekipa bombeiros to'o kedas iha fatin akontesementu, hodi evakua kondotor ne'ebé monu tama iha fatuk le'et ho kondisaun gráve no na'in 2 seluk ba iha óspital Same hodi hetan tratamentu urjénti”, katak, Bruno Magalhães.
Iha parte seluk, Médiku Jerál, Joanico Gusmão Soares, esplika, hafoin halo tratamentu emerjénsia kontinua transfere vitíma Ego Marçal ne’ebé nu’udar kondutor mai óspital referal Maubesi hodi hetan tratamentu intensive tanba ruin kosen tohar.
“Kondutor ho naran Marçal, hafoin halo tratamentu iha óspital Same, refere kedas ho ambulánsia ba óspital referál Maubesi, tanba ruin knósen sorin tohar,dada ís araska, hetan kanek bo'ot no naklés iha kotuk laran suku pontu 8”, tenik nia.
Maibe, kondutor nia subriñu, Grívaldo Cornelis Gonsalves Freitas ho vitíma seluk ho naran Mouzinho Tilman Noronha, kontinua hala’o tratamentu iha óspital Same tanba situasaun ladun grave.
Kondutor Ego Marçal ho nia subriño Grivaldo Freites hosi Díli – Fatumeta, Mouzinho Tilman, hosi Same. Hosi asidente ne’e rezulta tanki mina kuak hodi hamosu mina fakar iha fatin akontesementu. (Editór, Francisca Soares).
