Díli-SMI: Ministra Saúde – MS, Odete Maria Freitas Belo, aprezenta relatóriu durante enkontru Konsellu Ministru – KM, Tersa, (14/04) katak maizumenus timoroan hamutuk ema rihun rua atus sia hitu (2.907) mak simu ona vasina atrazeneca hodi prevene an hosi virus corona.
Hosi totál ema ne’ebés simu ona vasina ne’e kompostu hosi mane hamutuk rihun ida atus hitu hat nolu resin rua (1.742) no feto hamutuk atus ualu ualu nolu resin hitu (887).
“(Governu) halo ona vasina ba ema hamutuk 2.907, hosi númeru hirak ne’e feto hamutuk 887 no mane hamutuk 1742 mak simu ona vasinasaun”, dehan, Odete durante reuniaun KM, orseik.
Dadus hosi MS rejista ona pesoál saúde nia hamutuk ema na’in rihun ida atus neen sanolu resin sia (1.619) mak hetan ona vasinasaun no profisionál sira seluk hosi liña frente hamutuk ema na’in rihun ida sanolu (1010) mak simu ona mós vasinasaun refere.
“Vasina ona mós ba profisionál saúde hamutuk 1.619 no profisionál sira seluk hosi liña frente nian hamutuk 1 010”, esolika, Odete.
Parte MS mós halo aprezentasaun kona-ba rezultadu sira hosi teste laboratórium hosi Australia kona-ba variante sira SARS-CoV-2 ne’ebé dadaun iha Timor-Leste.
Tuir rezultadu analize hosi amostra hamutuk 70 ne’ebé hatudu variante rua mak hanesan variante ida ne’ebé deteta ona hosi nasaun sira seluk iha rejiaun no variante ida seluk hosi Reinu Unidu.
Rezultadu barak maka hetan iha amostra 70 ne’ebé analiza ona hatudu padraun hanesan ba ida-ne’ebé deteta ona iha país sira seluk iha rejiaun nian no deteta ona kazu variante ida husi Reinu Unidu (B.1.1.7)”, katak nia.
Governu liu-hosi Ministériu Saúde faze tuir mai seei haruka amostra liu 246 ba laboratórium hodi bele halo analiza. (Editór, Caleri).
