04
Sat, Dec
0 New Articles

TL Lakon Millaun $225 Hosi Impaktu Inundasaun

Mota sobu komunidade nia uma tanba impaktu hosi inundasaun relasiona ho udan-boot iha loron 04 Abril 2021. Foto, Internete.

Flash News

Díli-SMI: Tuir dadus prelimanáriu ne’ebé ekipa tarefa hosi Governu verifika no rekoilla iha teritóriu laran hosi impaktu inundasaun iha loron 04 Fevereiru 2021 hatudu katak totál infra-estrutura hamutuk millaun $225 mak hetan estragus.

“Ohin mensiona kona-ba estimativu, iha ne’e dadus prelimináriu ne’ebé ekipa halo identifikasaun katak totál kustu ne’ebé Exelénsia Sr. Vise Primeiru Ministru ohin akresenta ona iha millaun $225 hanesan ne’e, ne’e dadus perlimináriu identifikasaun hosi ekipa de tarefa ne’e hala’o,” dehan, Ministru Obras Públikas, Salvador Soares Pires, durante hala’o audénsia ho membru Komisaun C Parlamentu Nasional, Kuarta, (14/04).

Parte MOP relata mós katak durante ne’e Governu kordena ona ho kompañia hamutuk 20 resin ne’ebé hala’o hela atividade normalizasaun inklui parte Institutu Jestaun Ekipamentu – IJE iha fatin 29 iha área kapitál Díli.

“Hakarak relata ba ita-boot sira katak iha kompañia 20 resin ne’ebé mak ajuda, iha mós atividade fatin 29 ne’ebé IJE atende hela”, Tenik, Salvador.

Atividade normalizasaun ba fatin sira ne’ebé hetan impaktu hosi inundasaun mak hanesan Mota Maloa, Estrada Bekusi, Armajen SAMES nian, Palásiu Prezidensiál, hasai ai iha ponte Bekora Mota ulun, hasai fatuk estrada Tibar, hasai fatuk no ai iha mota Ponte Bekussi.

Salvador mós aprezeta kona-ba normaliza mota Bidau Masaur, hasai sedimentasaun iha mota Metiaut Hotel SK nian, hasai rai monu taka estrada iha Área Branka, no mós hasai taho iha estrada Manleuanna.

Hala’o mós normaliza mota Maloa aldeia Mate-Restu, hasai fatuk no rai taka estrada iha Metiaut, ateru estrada iha Golgota aldeia 4 Setembru, normaliza mota Manleuanna no mós hasai taho no rai-henek ne’ebé taka estrada iha Bidau Santana.

Inklui mós normaliza mota iha Bedois, normaliza mota iha Hera hodi salva tore eletrisidade, hasai tahu iha estrada Faról, hasai sedimentasaun iha suku Maskarinas, hasai rai iha estrada Taibessi, ateru estrada Marabia, ateru estrada iha uma defisiénsia nian.

Governante ne’e esplika tan katak liu-hosi koopersaun entre Governu ho kompañia sira hodi halo normalizasaun hosi impaktu inundasaun ne’ebé durante ne’e hala’o iha munisípiu sira.

“Atendimentu kuaze horseik ba estrada kotu iha Laklubar, Remexio no mós Lekidoe ne’ebé ami halo hela esforsu para fahe ami-nia rekursu atu halo atendimentu ho kooperasaun setór privadu sira-nian”, katak, Pires.

Hodi responde impaktu hosi inundasaun foin lalais ne’e, Governu establese ekipa 2 mak hanesan ekipa umanitaria ho ekipa infra-estrutura. Ekipa infra-estrutura lidera hosi Vise Primeiru Ministru no Ministru Planu Ordenamentu Teritóriu no ekipa Umanitaria lidera hosi Ministru Administrasaun Estatal.

Iha tinan 2020 rasik Timor-Leste hetan estragus infra-estrutura hamutuk besik millaun $20 hosi impaktu inundasaun iha kapitál no Hera relasiona udan durante semana ida nia laran. (Editór, Caleri).

 

Pin It

Follow us on Twitter

Sign up via our free email subscription service to receive notifications when new information is available.