Hera-SMI: Espoza Prezidente Repúblika, Cidália Nobre Guterres, hala’o asaun solidariedade hodi fó apoiu umanitáriu hanesan nesesidade báziku ba membru Falintil Forsa Defeza Timor Leste – F-FDTL parte komponente Naval hamutuk uma-kain 98 iha suku Hera ne’ebé hetan inundasaun iha loron 04 Abril foin lalais ne’e.
Cidália Guterres, esplika, akontesmentu inundasaun foin lalais ne’e membru F-FDTL mós hetan impaktu inklui milítar ida lakon nia oan tanba mota lori no to’o ohin loron seidauk hetan.
“Lori nesesidade bázika hodi apoiu membru Forsa Militares uma-kain 98 ne’ebé hetan mos dezastre naturais. Agora todan mak ita-nia maun-alin ho família sira ne’ebé lakon sira nia membru família, balu bee lori, balu rai taka i mate sira hakoi, maibé balu too agora seidauk hetan. Hanesan militar ida nia bebee to’o agora seidauk hetan”, katak, Cidália Nobre, iha Hera, Tersa, (20/04).
Hafoin distribui apoiu umanitáriu ba membru milítar komponente Naval sira, ekipa prezidénsia repúblika ne’ebé lidera hosi espoza Prezidente Repúblika kontinua hala’o asaun solidariedade iha suku Bairo-Pite no Manleuana.
Maizumenus uma-kain hamutuk 65 iha suku Bairo-Pite no haree kondisaun família uma-kain 70 iha suku Manleuana ne’ebé to’o ohin loron sei kontinua hela iha lona okos.
“(Ami) kontinua desloka ba iha aldeia Foslam suku Bairro-Pite hodi apoiu nesesidade bázika ba família afetada hamutuk uma-kain 65. Vizita (mós) ba suku Manleuana hodi haree kondisaun vítima dezastre naturais, uma kain liu hitu-nulu ne’ebé to’o agora obrigamente sei hela iha lona okos”, dehan, Cidália.
Durante hala’o asaun solidariedade, Xefe Suku Manleuana, Jacob Tilman, husu ba inan-nasaun buka-dalan hodi rekopera lalais komunidade hosi impaktu inundasaun no lori fila fali ba sira nia hela fatin.
“Ha’u husu ba Sua Exelénsia atu ita-nia komunidade sira iha lona okos, labele demora (ka) kleur liu. Tanba bele afeta ba sira nia saúde, tanba sira nia uma la aproveita, balu hela ho ropa isin lolon. Husu ba Sua Exelensia hatoo ba na’i Prezidente Repúblika bele karik halais uitoan harii uma emerjénsia atu komunidade sira ne’e bele hela ba”, tenik, Jacob Tilman.
Apoiu ba Naval-Hera, fos hamutuk saka 60, supermi kaixa-37, mina kaixa-10, energen Kaixa-10, Sabaun kaixa-5, Masin Kaixa-4, Pastadente no Iskoba kaixa-7. No, apoiu ba Aldeia Fuslam, fos saka-60, supermi kaixa-30, mina kaixa-10, energen kaixa-10, rinso kaixa-10, sabaun kaixa-4, masin kaixa-4.
Iha parte suku Manleuana, ekipa distribui fos saka-60, supermi kaixa-40, mina kaixa-20, energen kaixa-20, masin kaixa-4, pastadente no eskoba kaixa-11, no ropa-laran. (Editór, Caleri).