Metinaro-SMI: Reprezentante família matebian pasiente COVID-19, Francisca Sousa Gama, husu agradesementu ba Estadu liu-hosi Sentru Integradu Jestaun Krize – SIJK ne’ebé disponivél hodi hamutuk ho família kari aifunan no sunu lilin iha seminteriu Hera-Metinaro.
“Ha’u reprezenta família hato’o agredese wain ba Nasaun no Estadu , inklui Sentru Integradu Jestaun Krize - SIJK ne’ebé ohin (20/04) akompaña família lori aifunan no harii kruz iha matebian Francisco Sousa Gama nia rate. No, lori família. Ha’u husu diskulpa ba Nasaun no Estadu inklui ekipa SIJK ne’ebé karik mosu insulta ruma hosi mídia sosiál”, katak, Domingos Ximenes, iha Metinaro, (20/04).
Domingos, hatutan, família tomak hosi matebian Francisca Gama sente laran moras duni wainhira Estadu deside halot matebian iha semiteriu Metinaro maibe tanba tau importansia ba saúde ema barak nian ikus-mai simu desisaun Estadu ho liman rua.
“Iha loron 6 Abril 2021, halot ami nia alin matebian Francisca Sousa Gama iha, halo ami família laran moras tebes, maibe ami prontounafatin simu ho liman rua, hodi tuir regras ne’ebé ita nia Nasaun adopta hosi saude mundial”, dehan, Domingos.
Iha parte seluk, Kordenador Estadu Maior SIJK, Komodoro, Donaciano Costa Gomes, “Pedro Klamar Fuik” apresia no no hakruk ba kolaborasaun família matebian ne’ebé koopera ho Estadu maske sente laran moras.
“Situsaun ida ne’e, halo família no ita hotu laran moras no mosu desintendimentu iha ita-nia sosiadade, maibe ho família nia laran luak, no laran diak, hakarak halo di’ak ba ema barak nia di’ak, no ajuda Nasaun iha momentu ne’ebé maka difisil, mosu desintendimentu oin-oin, maibe família kopera tebes ho Estadu no Nasaun, ho ida ne’e , ami hakruk teb-tebes”, tenik, Pedro Klamar Fuik.
Komodoro Pedro Klamar Fuik, esplika, matebian Francisca Sousa Gama mate ho COVID-19 tanba moras komplikadu, la’os mate tanba COVID-19. Nune’e, nia reprezenta SIJK husu deskulpa ba família matebian Francisca Gama ne’ebé hakohi iha loron 6 fulan Abril foin lalais ne’e la tuir kustume no tradisaun timor nian.
“Matebian hakotu peregrinasaun, iha situsaun ida ne’ebé maka ita nia estadu buka dala hotu-hotu hodi prevene virus mundial ida ne’e , labele hadaet ba ema hotu ne’ebe fulneravel. “Ha’u lori naran Sala situsaun hakarak husu diskulpa ba matebian ho familia tanba halot iha loron 6 abril 2021, dala ruma la tuir ita nia kustume , tradisaun kultura , ami husu diskulpa barak”, tenik nia.
Antes ne’e, Xefe Governu, Taur Matan Ruak, ne’ebé hanesan mós komandante opesaun sala situasaun hato’o ona deskulpa ba família matebian Francisca Gama wainhira mosu polímika kona-ba hakohi matebian pasiente COVID-19 Armindo Borges ne’ebé família ho líder nasionál Xanana Gusmão atu hakohi iha semiteriu Manleuana. (Editór, Caleri).
