18
Tue, May
3 New Articles

Durante Fulan Abril, Timoroan Na’in 3 Mate Ho COVID-19

Ekipa protokolu COVID-19 hakoi pasiente mate ho COVID-19. Foto, Mídia TATOLI.

Flash News

Díli-SMI: Durante fulan Abril 2021, timoroan hamutuk ema na’in 3 mak mate ho COVID-19 hafoin nasaun ne’e tinan ida liu iha ámbitu Estadu Emerjénsia ne’ebé Governu deklara hodi kombate propagasaun Corona Virus iha rai-laran.

Timoroan na’in tolu ne’ebé mate ho COVID-19 ne’e mak hanesan Francisca Sousa Gama ne’ebé mate iha loron 6 fulan Abril, Armindo Borges mate iha loron 11 fulan Abril no Olga Mendonça rasik mate ohin loron 22 fulan Abril 2021.

Relasiona ho matebian pasiente COVID-19, Olga Mendonça (61) ne’ebé hakotu ninia iis iha Sala Izolamentu Vera Kruz ohin dader tuku 8:30 otl tanba moras komplikadu no ikus-mai mate ho COVID-19.

Manuel João Mendonça, nu’udar reprezentante esplika katak matebian Olga Mendonça antes tama iha izolamentu Vera Kruz indentifika ona sofre moras hanesan mear, iis boot, tensaun, isin manas hafoim hala’o konsulta iha Klinika Foho Osan Mean.

“(Médiku) sira halo swab ba nia dehan fali kona COVID-19, maibé doutór balun dehan nia pulmaun fo’er ho kondisaun ninian iis boot ho tensaun, ne’e mak lori mai iha ne’e”, dehan, João Mendonça, iha Sentru Izolamentu Vera Kruz, Kinta, (22/04).

Nune’e, Maunel Mendonça, hatutan, família lori ba Hospital Guido Valadares – HGV no médiku halo teste swab ne’ebé hatudu rezultadu COVID-19, tan-ne’e família kopera ho Estadu hodi hala’o izolamentu iha Vera Kruz atu hetan tratamentu saúde para bele rekopera fila fali maibe ikus mai ohin dadersan hakotu nia iis.

“Koko ba dehan COVID-19, ami atu lakohi fó móssente la di’ak, tan ne’e desizaun hosi governu ita tenke kopera. Tanba governu deside dehan ida-ne’e COVID-19 ona ami lori mai izolamentu ba rekopera nia moras ne’e ho didi’ak, mais ohin loron nia husik iis”, tenik, Manuel.

Kona-ba prosesu funeral ba matebian Olga Mendonça, família hakarak hakoi iha semitériu públiku iha Bekussi.

Liga ejizensia família, Kordenadór Destakamentu Reasaun Rápida, Aurélio Guterres, esplika, parte Governu liu-hosi Sentru Integradu Jestaun Krize – SIJK konkorda ona hamutuk ho família hodi hakoi matebian iha semitériu Bekussi maibe kontinua tuir protokolu COVID-19.

Ami ho família konkorda haloot iha semitériu públiku Bekussi hodi halo tuir ita-nia kultura buat sira-ne’e hotu, depois aban dader sei foti ba mate-isin ba halot iha semitériu públiku Bekussi, parte família prontu kopera ho governu atu halot tuir protokolu saúde nian,”Aurélio Guterres.

Matebian Olga Mendonça, tama iha sala izolamentu Vera Kruz durante loron 3, dezde loron 19 fulan Abril no hakotu iis iha loron 22 Abril 2021. Olga Mendonça mate husik oan na’in lima (5) ne’ebé kompostu mane 2 no feto 3. (Editór, Caleri).

Pin It

Follow us on Twitter

Sign up via our free email subscription service to receive notifications when new information is available.