Díli-SMI: Kordenadór Forsa-Tarefa Prevnsaun no Mitigasaun Surtu COVID-19 iha Timor-Leste, Dr. Rui Maria de Araújo, hatete, tuir estimasaun hosi rezultadu peskiza no analíze hosi Ministériu Saúde katak maizumenus ema rihun rua nolu (20,000) iha kapitál Díli hetan ona infesaun hosi COVID-19.
Kalkulasaun ka estimasaun ne’e bázeia ba rezultadu analize laboratórium hatudu aumenta prevalénsia durante semana ida (16 to’o 22) identifika surtu COVID-19 iha munisípiu Díli aumenta ba bebeik ne’ebé ema barak mak bele infetadu nian.
“Aumenta prevalénsia iha semana ida (16 to’o 22 Abril) kompara ho semana rua antes (2 to’o 15) hatudu surtu iha munisípiu aumenta ba bebeik. No, hatudu katak ema barak ba hetan infetadu ona. Haree (hosi) faktu katak maiória hosi ne’ebé deteta pozitivu mak la-hatudu sintomas, signifika Sars-CoV-2 da’eit maka’as ona ba mai iha komunidade nia leet.
Sé ita aplika 7,3% ba populasaun Díli, signifika atualmente maizumenus 20 mill pesoas mak infetadu ho Vírus Sars-COVID-2 iha munisípiu Díli”, dehan, Rui Araújo, wainhira hato’o Komunidade Imprensa iha Sala Situasaun, Merkadu-Lama-Díli, Duminggu, (25/04).
Tuir relatóriu hosi evolusaun surtu COVID-19 hatudu katak kazu konfirmadu komulativu ne’ebé sura hosi loron 21 fulan Marsu 2020 hamutuk 1897. Kazu foun ne’ebé relata orseik hamutuk 89 ne’ebé kompostu hosi kazu 70 iha kapitál Díli no restu hamutuk19 iha munisípiu sira.
Rui Araújo, hatutan, durante semana rua fulan Abril 2021 rejista prevalénsia maizumenus 264 mak pozitivu hosi totál ema 7564 mak halo teste swab atu halo viazen ba munisípiu.
“Entre 2 Abril ho 15 Abril 2021 (semana 2): Prevalénsia 3,5% (264 pozitivu hosi ema 7564 ne’ebé halo teste rastreiu aleatóriu & rastreiu atu halo viájen sai husi serka sanitaria Munisípiu Dili). Entre 16 Abril ho 22 Abril 2021 (semana 1): Prevalénsia 7.3% (425 pozitivu hosi ema 5799 ne’ebé halo teste rastreiu aleatóriu & rastreiu atu halo viázen sai hosi serka sanitaria Munisípiu Díli)”, dehan, eis Primeiru Ministru no Ministru Saúde ne’e.
Iha parte seluk, Peskizador Ministériu Saúde, Nelson Martins, semana ida antes (22/04) hasai ona rezultadu estimasaun katak maizumenus ema rihun 15 mak hetan ona sintomas COVID-19 ne’ebé espalla iha bairru sira iha Díli laran.
“Dadus hosi maluk sira ne’ebé hatama rekerementu ba atu ba munisípiu, wainhira halo teste hatudu kuaze 5% maka positivu. Wainhira taxa 5% nee aplika ba populasaun Díli, maka ita-bele halo estimasaun katak iha ona 15,000 populasaun maka karik infetadu ona husi COVID-19 ne’ebé moris hela iha bairu -bairru, Dili laran”, dehan, eis Ministru Saúde iha Governasaun Aliansa Maioria Parlamentar ne’e.
Dadaun ne’e Governu kontinua esforsu-hosi halo vasinasaun AtraZeneca ba ema timoroan hamutuk ema rihun rua atus sia hitu (2.907) no kontinua husu apoiu médiku espesiálista sira hodi tulun médiku timoroan iha luta kombate surtu COVID-19 ne’e. (Editór, Caleri).