Díli-SMI: Eis Prezidente Repúblika, José Ramos Horta, louva no apresia serbisu VIII Governu liu-hosi Ministériu Saúde iha ámbitu luta kombate pandémia COVID-19 tanba esforsu hodi halo vasinasaun liu ema rihun rua kada-loron kompara ho iha nasaun seluk.
“Ha'u haree Ministériu Saúde halo vasina di'ak no aselera, kompara ho rai balun, ha'u iha dadus katak iha Papua Nova Guine sira konsege halo vasina 200 kada loron maibé Timór konsege vasina kada loron rihun 2 resin. Katak, Ministériu Saúde iha kapasidade halo vasinasaun ne'e”, dehan, Ramos Horta, Palásiu Governu wainhira hasoru malu ho Primeiru Ministru, Taur Matan Ruak, Tersa, (27/04).
Durante audénsia, Ramos Horta husu ba Governu atu bele aslera fornesementu vasina AtraZeneca mai Timor-Leste iha tempu badak atu nune’e bele kompleta planu vasinasaun ba komunidade iha teritóriu laran.
Nune’e mós lider nasional no Premiadu Nobel da Paz ne’e sujere Governu kontinua uza vasina AtraZeneca ne’ebé ninia kualidade di’ak no efikasia duni.
“Ha’u hanoin vasina AstraZeneca liu-hosi sistema COVAX no OMS di’ak liu ba Timor-Leste no lalika kahur barak demais ho vasina oioin. AstraZeneca sientista boot Inglaterra, Suiçia nia kompañia boot iha universidade Oxford efikas duni liu 80% ho segundu dozes bele liu 80%-resin Austrália mak atu fornese fábrika tuir regra Austrália nian, ne’e duni ha’u konfiansa, hanoin ne’e maka ita tenke buka fornesementu barak liu husi Austrália”, tenik, Eis Primeiru Ministru ne’e.
Tuir nia, númeru infesaun pozitivu COVID-19 ne’ebé dadaun aumenta boot no tama ona iha faze transmisaun komunitáriu ne’e tanba públiku ninia ignoransia no laiha konsensia hodi tuir regra ka protokolu saúde nian.
Nune’e mós tanba movimentu ilegál iha liña fronteira ne’ebé susar hetan kontrolu ho di’ak ikus-mai fó impaktu boot ba komunidade nia saúde, barak mak hetan pozitivu COVID-19.
“Infesaun ne’ebé aumenta iha Timor-Leste no aumenta mós tanba ita-nia sosiedade la-kumpri desizaun ne’ebé Governu halo, primeiru ita hatene hahú ho ita-nia populasaun sira ne’ebé ba Indonézia tama arbiru liu-hosi dalan ilegál ho pozitivu depois kuandu Governu halo lockdown iha Dili atus ba atus halai subar ba foho”, katak nia.
Ho situasaun pandémia COVID-19 iha rai-laran, Ramor Horta rasik hakarak kontribui Governu hodi halo sensibilizasaun ba komunidade hodi nune’e bele tuir regra sira hosi Organizasaun Mundiál Saúde ne’ebé aplika ona iha mundu tomak.
“Ha’u-nia preokupasaun mak ne’e atu kontribui para halo sensibilizasaun boot liu ho ita-nia sosiedade, primeiru tuir regra ne’ebé autoridade saúde Organizasaun Mundiál Saúde (OMS). Iha mundu tomak regra hanesna de’it mak máskara, distansiamentu, labele halibur ema barak, kuandu kumpri ida ne’e bele diminui”, dehan nia. (Editór, Zé Amaral).
