18
Tue, May
3 New Articles

Loron 1 Maiu, PD Kongratula Traballador Timoroan

Timoroan hala’o marsa wainhira selebra loron mundiál traballador nian iha Timor-Leste. Foto, Internete.

Flash News

Díli-SMI: Prezidente Partidu Demokrátiku – PD, Mariano Sabino, hatete, liu-hosi selebrasaun loron traballador nian, família boot partidu PD fó parabéns ba traballador timoroan iha rai-laran no rai-liur ne’ebé sai nu’udar heroi foun liu-hosi sira nia kontribuisaun ba dezenvolvimentu nasaun Timor-Leste.

“Família boot demokrátiku hakarak hato’o parabéns ba traballador sira iha mundu. (Ho) sira nia ejisténsia serbisu, sira nia obra mak muda mundu ida-ne’e, sai modernizadu, sivilizadu ho teknolójia. Imi mak heroi ba rai ida-ne’e (Timor-Leste)”, dehan, Mariano Sabino, iha Sede PD Colmera, Sabádu, (01/05).

Iha loron importante ne’e, eis Ministru Agrikultura ne’e fó korazen ba traballador timoroan iha rai-liur no rai-laran atu kontinua hatudu vontade serbisu hanesan heroi hodi kontribu ba mudansa dezenvolvimentu iha nasaun ida-ne’e.

“Ba traballador timoroan, imi hotu iha ne’ebé de’it tantu iha rai-laran no rai-liur hanesan Inglatera, Irlandia, Koreia, Australia no nasaun ne’ebé de’it, imi hotu aswain no heroi foun ba Timor-Leste nian, tanba (ho) imi nia kontribuisaun bele muda ita nia rai no ita nia nasaun”, tenik nia.

Tuir nia, Timor-Leste hetan ona independensia durante tinan 20 ona maibe seidauk ona revizaun ba lei traballador nian, liu-liu oinsa hasa’e saláriu minimu ba traballador sira iha rai-laran.

Tanba nasaun ida-ne’e ho ninia riku-soin ho populasaun ema tokon ida resin de’it maibe traballador sira kontinua moris ho kondisaun ne’ebé la-favorese hodi garante sira nia moris wainhira la-serbisu ona.

“Rai ida-ne’e ki’ik no riku mina. Populasaun hamutuk ema tokon ida resin, tuir loloos traballador sira moris di’ak, timoroan hothotu tenke sai númeru um iha nia rai rasik”, katak Sabino.

Atúal membru Parlamentu Nasionál ne’e katak tempu ona atu Governu no Estadu Timor-Leste hodi dignifika povu no traballador sira tanba povu mak nu’udar sentru ba dezenvolvimentu iha nasaun ida-ne’e. (Editór, Zé Amaral).

Pin It

Follow us on Twitter

Sign up via our free email subscription service to receive notifications when new information is available.