Díli-SMI: Primeiru Ministru – PM, Taur Matan Ruak, fó ona instrusaun komandu superior instituisaun defeza no seguransa atu kolabora hamutuk hodi asegura territóriu nasionál hosi ameasa esternal, liu-liu movimentu ilegál ne’ebé sempre invade liña fronteira trestre Timor-Leste nian.
Nune’e mós fó orientasaun atu komandu hosi instituisaun milítar no polísia kontinua sensibiliza ba sidadaun sira kona-ba regra Organizasaun Saúde Mundiál – OMS ne’ebé parte Ministériu Saúde hasai ona hodi nune’e bele prevene a’an hosi virus corona.
“PM fó orientasaun ba komandu forsa rua kolabora hamutuk asegura seguransa iha territóriu nasionál tomak no husu atu membru seguransa sira kontinua halo nafatin sensibilizasaun hodi sidadaun sira komprende nune’e sira bele kumpri regras ne’ebé Organizasaun Saúde Mudiál no Ministériu Saúde fó sai atu ema hotu bele prevene a'an hosi moras invizivél ida-ne’e”, dehan, komunikadu ofisiál hosi Ministériu Interiór ne’ebé redasaun asesu, Segunda, (03/05).
Xefe Governu fó orientasaun ba komandu instituisaun milítar no polísia ne’e wainhira hala’o reuniaun ho superior instituisaun Falintil Forsa Defeza Timor-Leste – F-FDTL, Polísia Nasional Timor-Leste – PNTL, Ministru Defeza, Vise Ministru Interiór no ekipa hosi Sentru Integradu Jestaun Krize – SIJK nian.
Durante enkontru refere, Vise Ministru Interiór, Antonio Armindo, relata kona-ba situasaun seguransa jerál iha territóriu laran liga ho implementasaun regra Estadu Emerjénsia – EE no rezolusaun konfinamentu domisiliáriu jerá iha munisípiu Díli.
Antes ne’e, parte Komandu Jerál PNTL fó ona orientasaun ba komandu munisípiu no komandante operasional hodi asegura implementasaun Serka Sanitariu – SerSan liu-hosi atividade hasa’e kuiñesementu públiku kona-ba regra hosi EE refere.
“Komandu Jerál alerta ona ba kada Komandu Munisípiu no Komandante Operasaun halo ona mapamentu ba implementasaun serka sanitária liu-hosi sosializasaun, sensibilizasaun, pasa revista iha estrada públiku, bandu movimentu komunidade no transporte públiku sira ne’ebé laiha nesesariu hodi asegura implementasaun rezolusaun Guvernu kona-ba konfinamentu domisiliáriu jerál”, tenik komunikadu ofisiál ne’e.
Enkontru entre Taur Matan Ruak, ho superior instituisaun F-FDTL – PNTL no Ezekutivu iha Ministériu Defeza no Seguransa inklui ekipa SIJK ne’e hala’o iha rezidensia ofisiál Primeiru Ministru Farol-Díli. (Editór, Zé Amaral).
