Díli-SMI: Ministra Saúde, Odete Maria Freitas Belo, hatete, Governu Timor-Leste iha tempu badak nia laran sei simu vasina Sinovac hosi nasaun Xina ne’ebé iha ona konkordansia maske seidauk iha kalendariu fiksu vasina refere to’o iha Timor-Leste.
“Ita sei hetan rihun-sanulu (10.000) dozes no iha tempu hanesan ita mós prepara atu simu vasina seluk hosi COVAX Facility nian. Data ita seidauk iha serteza nomós iha vasina seluk hosi Xiña nian SINOVAX ne’e loos ona maibé data serteza ne’e seidauk”, dehan, Odete Freitas Belo, hafoin hala’o enkontru ho Primeiru Ministru, Taur Matan Ruak, iha rezidénsia ofisiál Farol, Tersa, (04/05).
Maske nune’e, Governante ne’e esklarese, ohin loron 5 Maiu 2021 Governu liu-hosi Ministériu Saúde sei simu tan vasina AtraZeneca hosi Governu Austrália hamutuk rihun sanolu (10.000) dozes vasina ba COVID-19 nian.
“(Ohin) ita sei simu vasina ne’ebé mak apoiu husi Governu Austrália, ida-ne’e la’ós COVAX Facility, maibé ida-ne’e apoiu bilateral serbisu hamutuk entre Governu Timor-Leste ho Governu Austrália no ita sei hetan dozes rihun-sanulu (10.000) vasina ba Covid-19 nian”, tenik, Odete Belo.
No, iha loron 19 Maiu Timor-Leste sei hetan tan apoiu vasina AtraZeneca hosi parte COVAX Facility nian hamutuk rihun sanolu (10.000) dozes.
“Depois dia 5 ho dia 19 mós ita sei hetan rihun-sanulu (10.000) dozes no iha tempu hanesan ita mós prepara atu simu vasina seluk husi COVAX Facility nian”, katak nia.
Tuir planu Governu nian katak vasina AtraZeneca hamutuk rihun sanolu ne’ebé to’o ohin loron sei hala’o lansamentu ofisiál ba vasinasaun iha loron 10 fulan Maiu tinan ida-ne’e.
Lansamentu vasinasaun ne’e sei fó perioridade ba pasiente sira hanesan HIV-Sida, TBC, Diabetes nomós ba sidadaun sira ne’ebé tinan 60 ba leten.
“Daudaun ita iha kazu COVID-19 ne’ebé mak aas iha Kapitál Díli entaun ami hakarak dehan rihun-sanulu ne’ebé mak aban sei mai ne’e, nia lansanmentu ita sei halo iha loron 10 fulan-maiu. Ita haree liubá iha pasiente ba ema sira ne’ebé mak di’ak iha uma maibé hanesan ho HIV-Sida, TBC, Diabetes, ita fó uluk ba sira depois ita-mós haree ba ne’ebé mak idade neen-nulu ba leten”, dehan nia.
Antes remata entrevista, Governante ne’e fó argumentu katak planu perioridade ba ema pasiente sira no idade 60 ba leten tanba nu’udar sentru ba risku atu hetan da’et virus corona.
“Sira ne’e mak risku aas liu bainhira Covid-19 kona, risku aas liu atu bele bá toba iha Óspital uza ventileitór atu todan liu ne’e ba sira entaun ita fó uluk ba sira depois dozes tuir-mai prontu ba ita sira-ne’ebé mak presiza ita bele vasina”, tenik nia.
To’o ohin loron Governu kontinua esforsu hodi luta kontra pandémia COVID-19 liu-hosi implementasaun Estadu Emerjénsia – EE ka Serka Sanitariu – SS iha kapitál Díli inklui munisípiu balun iha Timor-Leste. (Editór, Caleri).
