Díli-SMI: Tuir indentifikasaun parte Governu liu-hosi Ministériu Saúde nian kona-ba kapitál Díli hanesan episentru ba pandémia COVID-19 nune’e komunidade ka populasaun ne’ebé dadaun ne’e hela iha Díli sai nu’udar tarjetu primeiru ba vasinasaun atu labele hada’et tan ba munisípiu seluk.
“Kona-ba vasina ne’ebé hetan hosi Governu Austrália no Xina sei fó prioridade ba munisípiu Díli ne’ebé ohin-loron sai episentru Covid-19 hodi hada’et ba munisípiu seluk”, dehan, Taur Matan Ruak, hafoin hasoru malu ho Prezidente Repúblika, Francisco Guterres “Lú Ólo” iha Palásiu Prezidénsia Aitarak-Laran, foin lalais ne’e.
Taur Matan Ruak, esplika, vasina AtraZeneca ne’ebé parte Governu Australia apoiu no entrega liu-hosi Ministériu Saúde no Ministériu Negósiu Estrajeiru no Koperasaun – MNEK iha loron 5 fulan Maiu 2021 nu’udar pasu di’ak hodi konsentra halo vasinasaun ba komunidade iha kapitál Díli.
“Ne’e pasu di’ak. Konsentrasaun vasina sei iha Díli mak barak liu. Ha’u husu ita-nia komunidade sira apoia atu hamenus númeru, aleinde ita avansa ho vasina. Atu bele minimiza nia risku bai ta-nia sidadaun sira”, katak, Xefe Governu ne’e.
Eis Prezidente Repúblika ne’e mós esplika, durante ne’e Governu Australia apoiu ona vasina rihun 20 dozes no sei kontinua hetan ajuda iha tempu tuir mai.
Nune’e, parte Governu Xina ne’ebé simu ona pedidu hosi Timor-Leste sei fó apoiu mós vasina Sinovac hamutuk rihun atus ida (100,000) dozes iha tempu badak nia laran hodi kompleta programa vasinasaun iha rai-laran.
“Prinsípiu Juñu nian ita sei simu 100 mil husi Xina. Ne’e besik 190.000 ba fulan maiu no juñu. Vasina ba Timor-Leste hetan hosi inisiativa multilateral COVAX, Governu Australia no Xina”, tenik nia.
Maske nune’e, nia kontinua, Governu Timor-Leste bele sosa rasik vasina wainhira nesesita duni atu sosa tanba iha ona alokasaun orsamentu ba asuntu refere.
“Ita iha osan. Iha orsamentu ne’e ita tau osan ba vasina. Ita simu apoiu, bainhira nesesariu ita sosa, ita mós sosa.”
Tuir dadus Ministériu Saúde rejista katak dezde tinan kotuk to’o ohin loron maizumenus timoroan hamutuk ema na’in 5 mak mate ho virus COVID-19. (Editór, Zé Amaral).
