24
Thu, Jun
1 New Articles

Reprezentante TL Ba CPLP Hasoru Líder VIII Governu

Sekretáriu Ezekutivu disgnadu ba CPLP, Zacarias Albano da Costa ho Primeiru Ministru, Taur Matan Ruak, iha Farol-Díli. Foto, Mídia PM.

Flash News

Díli-SMI: Sekretáriu Ezekutivu designada ba organizasaun Komunidade País Lian Português – (CPLP), Zacarias Albano da Costa, hasoru malu ho Xefe Governu, Taur Matan Ruak, hodi husu agradesementu tanba kontinua fó konfiansa hodi kaer pasta hanesan tinan 2 tuir mai.

“Ha’u hakarak dehan, ohin ha’u mai hasoru señór Primeiru- Ministru para agradese ba konfiansa ne’ebé ke VIII Governu fó ba ha’u, atu sai nu’udar Sekretáriu Ezekutivu ba CPLP nian ba tinan 2021-2023 e posibilidade tinan rua tan 2023 to’o 2025”, dehan, Zacarias Albano, hafoin hasoru malu ho PM iha rezidensia ofisiál Farol, foin lalais ne’e.

Eis Ministru Negósiu Estrajeiru no Koperasaun – MNEK ne’e promete sei esforsu hodi fó apoiu ba serbisu ne’ebé Governu atribui ba nesesidade CPLP nian.

Nune’e bele garante konfiansa ne’ebé parte VIII Governu fó hodi reprezenta Estadu Timor-Leste iha organizasaun CPLP ne’ebé harii ona tinan 25 liu ba ne’e.

“Ha’u sente enkontru ne’e pozitivu tebetebes, Señór Primeiru Ministru dehan sei fó apoiu tomak ba serbisu ne’ebé mak ha’u sei hala’o, sei fó apoia tomak ba serbisu ne’ebé presiza nesesidade CPLP nian”, tenik Zacarias.

Tuir nia katak kargu Sekretáriu Ezekutivu CPLP ne’ebé atu kaer hosi Timor-Leste ne’e hafoin reuniaun siméira entre Xefe Estadu no Xefe Governu CPLP nia ne’ebé tuir planu sei hala’o iha Luanda-Angola, tinan ida-ne’e.

“Kargu Sekretáriu Ezekutivu CPLP, foin ba dahuluk atu kaer hosi Timor-Leste, dezde ezisténsia organizasaun ne’e, no kargu ne’e sei asumi, hafoin Simeira Xefe Estadu no Xefe Governu nian iha Luanda-Angola, loron 17 fulan jullu tinan ne’e”, katak nia.

Nia haktuir, durante enkontru ho Primeiru Ministru,Taur Matan Ruak, ko’alia no diskute kona-ba

oinsa Sekretáriu Ezekutivu dezignadu hosi Timor-Leste hala’o ninia knaa hodi kontribui ba organizasaun CPLP iha futuru oin mai.

Daudaun ne’e kargu Sekretáriu Ezekutivu kaer hosi Francisco Ribeiro Telles hosi Portugal dezde 2019. Membru CPLP kompostu hosi, Angola, Brazíl, Cabo-Verde, Guiné-Bissau, Guine Equatorial, Mozambique, Portugal, Saun Tomé no Príncipe, no Timor-Leste. (Editór, Zé Amaral).

Pin It

Follow us on Twitter

Sign up via our free email subscription service to receive notifications when new information is available.